धरणगाव (प्रतिनिधी) – मान्सूनच्या पूर्वसंध्येला धरणगाव तालुक्यात शेतीची कामे जोरात सुरू झाली आहेत. विशेषतः मे महिन्यात कपाशी लागवडीला वेग आला असून शेतकरी मशागत, बी-बियाण्यांची पेरणी आणि खत व्यवस्थापनात व्यस्त आहेत.
तालुक्यात यंदा कपूस, मका, सोयाबीन आणि बाजरीची लागवड मोठ्या प्रमाणावर होण्याची शक्यता आहे. कपाशीचे बियाणे आणि आवश्यक खतांचा साठा करून शेतकरी शेतात सक्रिय झाले आहेत. ट्रॅक्टर आणि पेरणी यंत्रांची मागणीही वाढली आहे. मात्र, शेतकामांच्या या गडबडीत ट्रॅक्टरसाठी लागणाऱ्या डिझेलची टंचाई जाणवू लागली आहे. पेट्रोलपंपावर डिझेल वेळेवर न मिळाल्याने मशागत रखडत असून यामुळे शेतकऱ्यांचे मोठे हाल होत आहेत.
“पेरणीची वेळ चालली आहे, पण ट्रॅक्टरला डिझेलच मिळत नाही. पंपावर तासंतास उभं राहूनही डिझेल मिळत नसेल तर पीक वेळेत कसं येणार?” अशी खंत धरणगावजवळील शेतकरी राजू पाटील यांनी व्यक्त केली. मे महिन्यात शेती कामांना आलेल्या गतीमुळे ग्रामीण भागात रोजगाराच्या संधीही वाढल्या आहेत, पण डिझेलटंचाईमुळे हा उत्साह काहीसा मावळला आहे. प्रशासनाने तातडीने डिझेल पुरवठा सुरळीत करावा, अशी मागणी शेतकऱ्यांनी केली आहे.
