नाशिक (वृत्तसंस्था) मसाज सेंटरच्या बहाण्याने उच्चभ्रू वस्तीत राजरोसपणे सुरू असलेला कुटणखाना पोलिसांनी उध्वस्त केला. आडगाव नाका भागात केलेल्या कारवाईत दोन मुलींची सुटका करण्यात आली असून, याप्रकरणी आडगाव पोलीस ठाण्यात एका महिलेसह तरुणाविरोधात पिटाअंतर्गत गुन्हा दाखल करण्यात आला आहे. गेल्या आठ महिन्यांपासून या ठिकाणी देहव्यापाराचा धंदा सुरू असल्याची माहिती समोर आली असून पोलीस आयुक्त संदीप कर्णिक यांच्या आदेशानुसार ही कारवाई करण्यात आल्याचे पोलिसांनी सांगितले.
शहरात मसाज सेंटरच्या नावाखाली देहव्यापार होत असल्याची माहिती पोलिसांना मिळाली होती. त्यानुसार गुन्हे शाखेचा अनैतिक मानवी व्यापार प्रतिबंधक कक्ष कामाला लागला होता. पथकाचे हवालदार शेरखान पठाण व गणेश वाघ यांना मिळालेल्या माहितीच्या आधारे ही कारवाई करण्यात आली. मध्यवर्ती गुन्हे शाखेचे वरिष्ठ पोलीस निरीक्षक डॉ. अंचल मुदगल यांच्या मार्गदर्शनाखील बुधवारी (दि.४) छत्रपती संभाजीनगर रोडवरील कपालेश्वरनगर भागात पथकाने छापा टाकला असता मसाज सेंटरच्या नावाखाली सुरू असलेल्या कुंटणखान्याचा भांडाफोड झाला.
ही कारवाई सहायक पोलीस निरीक्षक विश्वास चव्हाणके, पोलीस उपनिरीक्षक पंडीत अहिरे, महिला पोलीस उपनिरीक्षक वैशाली भाबड, सहायक पोलीस उपनिरीक्षक नामदेव सोनवणे, पोलीस हवालदार शेरखान पठाण, पोलीस हवालदार गणेश वाघ, पोलीस हवालदार समीर चंद्रमोरे, पोलीस अंमलदार प्रजीत ठाकुर, महिला पोलीस नाईक मनिषा जाधव, महिला पोलीस शिपाई वैशाली घरटे, लता सूरसाळवे, स्नेहल सोनवणे, चालक सहायक पोलीस उपनिरीक्षक विजय रायते आदींच्या पथकाने केली.
