जळगाव (प्रतिनिधी) नारायण राणे हे केंद्रीय मंत्री झाले व कोकणावर संकट आले म्‍हणजेच राणेच पांढऱ्या पायाचे असल्‍याचा जोरदार पलटवार पालकमंत्री गुलाबराव पाटील यांनी केला आहे. राणेंनी यांनी मुख्‍यमंत्री पांढऱ्या पायाचे असल्‍याने राज्‍यावर संकट आल्‍याचे वक्‍तव्‍य केले होते. त्याचाच आज ना. पाटील यांनी चांगलाच समाचार घेतला.
राज्‍यावर आलेल्‍या संकटाबाबत नारायण राणे यांनी मुख्‍यमंत्री हे पांढऱ्या पायाचे असल्‍याने राज्‍यावर संकट आल्‍याचे वक्‍तव्‍य केले होते. त्यावर आज पालकमंत्री गुलाबराव पाटील यांनी राणेंना जोरदार टोला लगावला आहे. राज्‍याचे पाणी पुरवठा व स्वच्छता मंत्री तथा पालकमंत्री गुलाबराव पाटील हे आज एका कार्यक्रमानिमित्त जळगावात आले होते. यावेळी त्‍यांनी पत्रकारांशी संवाद साधला. ना. पाटील म्हणाले की, राज्‍यावर मोठे संकट आले असून अशात गंभीर परिस्थितीत राजकारण करायला नको. तसं बघायला गेलं तर राणे हे केंद्रीय मंत्री झाले व कोकणावर संकट आले म्‍हणजेच राणेच पांढऱ्या पायाचे असल्‍याचा टोला मंत्री गुलाबराव पाटील यांनी लगावला. ना. पाटील पुढे म्हणाले, की राज्‍यावर आलेल्‍या संकटावर राजकारण करू नये. आलेल्‍या संकटात व्‍यक्‍ती म्हणून सर्वतोपरी मदत करायला हवी. माणसाने माणसाला मदत करायला एकसुती लढा द्यायला हवा. राजकारण करायला खुप आखाडे आहेत. जेव्‍हा वेळ असते तेव्‍हा तुमचा झेंडा घेवून तुम्‍ही उतरा आमचा झेंडा घेवून आम्‍ही आखाड्यात उतरू. मात्र राज्य संकटात असताना राजकारण करणे योग्‍य नसल्‍याचे मत देखील त्‍यांनी यावेळी व्‍यक्‍त केले.
