जळगाव (प्रतिनिधी) शहरातील रावसाहेब रूपचंद विद्यालय अर्थात आर आर विद्यालयाच्या शाळेच्या मैदानावर नववीच्या विद्यार्थ्यांचा अचानक मृत्यू झाल्याची घटना घडली आहे. या घटनेमुळे जळगाव शहरात खळबळ उडाली आहे.
याबाबत अधिक माहिती अशी की, कल्पेश वाल्मीक इंगळे (वय १५) असे मृत विद्यार्थ्याचे नाव असून कल्पेश हा सकाळी नेहमीप्रमाणे शाळेत आल्यानंतर दुपारच्या सुट्टीत मैदानात विद्यार्थ्यांसोबत खेळत असताना अचानक कोसळल्याने कल्पेशला शिक्षकांनी रुग्णालयात दाखल केले. मात्र, डॉक्टरांनी त्यास मृत घोषित केले. गेल्या काही दिवसांपूर्वी कल्पेशचे शाळेत काही विद्यार्थ्यांसोबत वाद झाले होते. त्यामुळे विद्यार्थ्यांच्या मारहाणीत कल्पेशचा मृत्यू झाल्याचा आरोप कल्पेशच्या कुटुंबियांनी केला आहे.
दरम्यान, शाळेतील सीसीटीव्ही फुटेज तपासून याबाबत सखोल चौकशी करण्याची मागणी पालकांनी केली आहे. जोपर्यंत चौकशी होत नाही तोपर्यंत मृतदेह ताब्यात न घेण्याचा पवित्रा पालकांनी व कुटुंबीयांनी घेतला आहे. यामुळे काही वेळ रुग्णालयात तणावाचे वातावरण निर्माण झाले होते. यावेळी मयत कल्पेशच्या नातेवाईकांनी ते शाळेत धाव घेत स्वतः सीसीटीव्ही फुटेज पाहण्याचे काम केले.
