जळगाव (प्रतिनिधी) “लोखंडाचा गंज हाच लोखंडाला मारत असतो, तर चंदन जेवढं घासलं जातं, तेवढा तो सुगंधित होतो. त्यामुळे लोखंडासारखं गंजत राहायचं की चंदनासारखं उजळायचं, हे तुम्हीच ठरवा,” असे विचार डॉ. तुषार पाटील यांनी व्यक्त केले. प्रत्येकाने स्वतःच्या क्षमतेनुसार शारीरिक व्यायाम करायलाच हवा, असेही त्यांनी यावेळी नमूद केले.
ओम सिद्धगुरू नित्यानंद प्रतिष्ठान संचलित वासुदेव जेष्ठ नागरिक संघाची मासिक सभा रिंग रोड येथे पार पडली. या कार्यक्रमात अध्यक्षपदी प्रकाश पाटील, सचिव सतीश जंगले, सहसचिव संजीव चौधरी, उपाध्यक्ष भानुदास पाटील उपस्थित होते, तर प्रमुख पाहुणे म्हणून डॉ. तुषार पाटील यांची उपस्थिती होती.
जळगाव जिल्ह्यातील एकमेव डॉक्टर म्हणून डॉ. तुषार पाटील यांनी सलग चार वेळा साऊथ आफ्रिकेतील सर्वात प्राचीन कॉम्रेड मॅरेथॉनमध्ये भाग घेतला. ही शर्यत विक्रमी वेळेत पूर्ण करत त्यांनी पदकांची हॅटट्रिक साधली. या यशाबद्दल संघातर्फे त्यांचा शाल आणि स्मृतिचिन्ह देऊन गौरव करण्यात आला.
आपल्या मनोगतात डॉ. पाटील म्हणाले, “खाजगी रुग्णसेवा सुरू केल्यानंतर रुग्णांचा प्रतिसाद वाढत गेला, पण त्यामुळे स्वतःच्या शरीराकडे दुर्लक्ष झाले. उच्च रक्तदाब, स्थूलपणा, डोकेदुखी यासारखे आजार वाढले. नुसते चालल्याने अपेक्षित परिणाम मिळत नव्हते. त्यामुळे मी हळूहळू धावायला सुरुवात केली आणि बघता बघता १०, १५ ते २१ किलोमीटर अंतर धावण्याचे यश मिळाले.”
यावेळी त्यांनी जेष्ठ नागरिकांच्या विविध आरोग्य समस्यांवर सविस्तर मार्गदर्शन केले आणि चर्चासत्रात उपस्थितांच्या शंकांचे निरसन केले.
या कार्यक्रमात अशोक ढाके, धनराज पाटील, भानुदास पाटील, नरेंद्र महाजन, पंडित शिरतुरे, सोपान नेमाडे, सुनील सूर्यवंशी, दीपक चौधरी, प्रकाश पाटील, एन. डी. माळी, दत्तात्रय चौधरी, एच. डी. इंगळे, रजनी राणे, रजनी तळेले, प्रमिला धांडे, छबुबाई झांबरे, भास्कर खाचणे आदी जेष्ठ नागरिकांचा वाढदिवसानिमित्त डॉ. तुषार पाटील यांच्या हस्ते उपरणे आणि पुष्पगुच्छ देऊन सत्कार करण्यात आला.
कार्यक्रमाची प्रस्तावना प्रकाश पाटील यांनी केली, प्रमुख पाहुण्यांचा परिचय डॉ. नितु पाटील यांनी करून दिला, तर आभार प्रदर्शन सतीश जंगले यांनी केले. कार्यक्रमाला जेष्ठ नागरिक मोठ्या संख्येने उपस्थित होते. “विश्वकल्याण साधनारी प्रार्थना” होऊन कार्यक्रमाचा समारोप झाला.
