मुंबई (वृत्तसंस्था) अल्पसंख्याक विकास कॅबिनेट मंत्री आणि राष्ट्रवादी काँग्रेसचे प्रवक्ते नवाब मलिक यांनी एनसीबीचे विभागीय संचालक समीर वानखेडे यांची मेहुणी ड्रग्ज व्यवसायात असल्याचा गंभीर आरोप ट्विटरवरुन केला होता. त्यानंतर खुद्द वानखेडेंनी यावर उत्तर दिलंय. जानेवारी २००८ मध्ये जेव्हा हे प्रकरण घडले तेव्हा मी सेवेतही नव्हतो. मग तरीही मी या प्रकरणाशी कसा संबंध असू शकतो?, असा प्रतिप्रश्न वानखेडे यांनी उपस्थित केला आहे.
या प्रकरणाशी संबंध कसा काय असू शकतो?
नवाब मलिक यांनी समीर वानखेडे यांच्या मेहुणीबाबत केलेल्या आरोपांनंतर वानखेडे यांनी या प्रकरणाशी त्यांचा संबंध कसा काय असू शकतो? असा प्रतिप्रश्न केलाय. हे प्रकरण झालं तेव्हा म्हणजे २००८ मध्ये आपण सेवेतही नव्हतो आणि क्रांती रेडकर यांच्याशी २०१७ साली विवाह झाला, असं वानखेडे यांनी म्हटलंय. त्यामुळे या खटल्याशी आपला या प्रकरणाशी कसा संबंध असू शकतो, असा सवाल वानखेडे यांनी केला आहे.
नवाब मलिकांचा आरोप काय ?
आर्यन खानच्या किडनॅपिंगचा मास्टरमाईंड मोहित कंबोज असल्याचा मोठा आरोप काल मंत्री नवाब मलिकांनी केला. यामध्ये समीर वानखेडे त्याला मदत करतो, असं नवाब मलिक यांनी म्हटलं होतं. आज पुन्हा समीर वानखेडेंवर नवाब मलिकांनी आरोपांचा ‘सिलसिला’ कायम ठेवला आहे. नवाब मलिक यांनी ट्वीट करत समीर वानखेडेंना सवाल केला आहे. समीर दाऊद वानखेडे, तुमची मेहुणी हर्षदा दीनानाथ रेडकर ड्रग्जच्या व्यवसायात गुंतलेली आहे का? तिची केस पुणे कोर्टात प्रलंबित असल्यामुळे तुम्ही उत्तर द्या. हा घ्या त्याचा पुरावा असं म्हणत ई कोर्ट सर्व्हिसेसवरील काही स्क्रिनशॉट शेअर केले आहेत. नवाब मलिक यांनी म्हटलं की, ती महिला कोण तिच्याशी समीर वानखेडे यांचा काय संबंध आहे, याबाबत त्यांनी स्पष्टीकरण द्यावं.
