फैजपूर (प्रतिनिधी) संतपंथ संप्रदायाचे मुख्य स्थान तीर्थक्षेत्र प्रेरणा पीठ (गुजरात) याठिकाणी श्रीराम मंदिर निधी समपर्ण कार्यक्रमाचे आयोजन नुकतेच करण्यात आले होते. यावेळी श्रीराम मंदिर जन्मभूमी तीर्थक्षेत्राचे कोषाध्यक्ष स्वामी गोविंदगिरीजी महाराज यांच्याकडे एक कोटीचा निधी समपर्णसाठी तसेच सतपंथ चॅरिटेबल ट्रस्ट फैजपूरकडून एक लाख निधी व महाराष्ट्रातील सतपंथ अनुयायी यांनी भरघोस निधी समर्पण केला.
या कार्यक्रमात प्रेरणापिठाचे जगदगुरु संतपंथाचार्य ज्ञानेश्वरदासजी महाराज, फैजपूरपुरचे महामंडलेश्वर स्वामी जनार्दन हरीजी महाराज, गुजरात राज्याचे उपमुख्यमंत्री नितीनभाई पटेल, गृहमंत्री प्रदीप सिहं जडेजा, सुरतचे गोविंदभाई धोकलिया, प्रेमदास बापू, अमेरिका, खिमजी भाई पटेल, देवाजी भाई पटेल व समस्त संतपंथ संप्रदायाच्या प्रतिनिधीची उपस्थिती होती. देव, देश आणि धर्मासाठी तन, मन, धनाने संतपंथी अनुयायी सेवा करत राहतील व देशातील समरसता, एकात्मता टिकवून ठेवण्यासाठी पुरुषार्थ करत राहतील, असे आश्वासन यावेळी महामंडलेश्वर जनार्दन हरीजी महाराज यांनी दिले. प्रभू रामचंद्राचे आदर्श चरित्र आहे. याद्वारे समृद्ध व समरसता पूर्ण भारताचे निर्माण होऊ शकते. म्हणून श्रीरामंचा सर्वांनी आदर्श घ्यावा, असे स्वामी गोविंदगिरीजी यांनी मार्गदर्शन केले.
