जामनेर (प्रतिनिधी) उन्हातून घरात येताच भोवळ येवून पडून दोघांचा मृत्यू झाल्याच्या घटना मागील दोन दिवसात जामनेर तालुक्यात घडल्यामुळे खळबळ उडाली आहेत. दरम्यान, उष्माघातामुळे मृत्यू ओढावल्याची शक्यता वर्तविली जात आहे.
खादगाव ग्रामपंचायतचे उपसरपंच प्रमोद चौधरी हे गुरुवारी दुपारी एक वाजे सुमारास शेतातून घरी आले. घरी येतात थंड पाणी पिऊन कुलर समोर बसले. काही वेळातच त्यांना उलटी होऊन भोवळ आल्याने बेशुद्ध झाले. घरच्यांनी त्यांना तात्काळ जामनेर येथील एका खाजगी रुग्णालयात दाखल केले, मात्र त्यांचा मृत्यू झाला. अति उन्हामुळे हृदयविकाराचा झटका आला असण्याची शक्यता डॉक्टरांनी व्यक्त केली. तर शुक्रवारी २४ रोजी दुपारी अतुल भागवत सोनवणे (वय ३५) हा बांधकाम मजूर दुपारी चार वाजेच्या सुमारास घरी येत असताना घराजवळ रस्त्यातच पडला. त्याला तात्काळ जामनेर उपजिल्हा रुग्णालयात दाखल केले तेथे डॉ. प्रवीण पाटील यांनी त्यास मृत घोषित केले.
