जळगाव (प्रतिनिधी) कोविड काळात चाळीसगाव ग्रामीण रुग्णालय, चाळीसगाव, महात्मा फुले आरोग्य संकुल येथे काम केलेल्या ॲम्ब्युलन्सचे भाडे शासनाकडे थकीत आहे. १५ लाख ५१ हजार ४०० ही थकीत बिलाची रक्कम मिळाली नसल्यामुळे जिल्हाधिकारी कार्यालयासमोर ॲम्ब्युलन्स मालक धीरज अशोक कासोदे याने आत्मदहन करण्याचा प्रयत्न केल्यामुळे एकच खळबळ उडाली आहे. दरम्यान, पोलिसांनी वेळीच धाव घेतल्यामुळे अनर्थ टळला.
कासोदे याच्या मालकीच्या तीन ॲम्ब्युलन्स कोविड १९ च्या वेळेस २१ ऑक्टोबर २०२० ते ७ ऑक्टोबर २०२१ या काळात शासकीय सेवेत होत्या. मात्र, या ॲम्ब्युलन्सचे १५ लाख ५१ हजार ४०० रुपयांचे भाडे शासनाकडे अद्यापही थकीत आहे. हे पैसे शासनाकडून अद्यापही धीरज कासोदे याला मिळालेले नाहीत. त्यामुळे थकीत वेतन न मिळाल्यास आत्मदहन करण्याचा इशारा दिला होता. त्यानुसार त्याने जळगाव जिल्हाधिकारी कार्यालयाच्या आवारात शुक्रवारी आत्मदहन करण्याचा प्रयत्न केला. त्याने अंगावर डिझेल ओतून घेतले. त्याला तातडीने जिल्हा पेठ पोलिसांनी ताब्यात घेतले आणि त्याचा जीव वाचविला.
