यावल (प्रतिनिधी) तालुक्यातील न्हावी येथील पाचवर्षीय बेपत्ता बालिका आणि तिचे वडील मागील तीन दिवसापासून बेपत्ता होते. परंतू मुलीचा मृतदेह गावालगत असलेल्या शेतविहिरीत आढळून आल्यानंतर प्रचंड खळबळ उडाली आहे. धक्कादायक म्हणजे मुलीचे वडील अद्यापही बेपत्ता असून पोलिस त्यांचा शोध घेत आहेत.
न्हावी- मारूळ रस्त्यावर ठुशा भावलाल बारेला हे कुटुंबासह राहतात. त्यांना तीन मुली आहेत. ते गुरुवारी (दि.१७) आपल्या पाच वर्षीय मुलगी अनिता बारेला हिला घेऊन घराबाहेर पडले होते. त्यानंतर ते घरी परतले नाही. म्हणून त्यांचा शोध सुरू होता.
अनिता ही गालफुगी, पोटफुगी, दमकोंडा अशा अनेक दुर्धर आजाराने त्रस्त होती.
शनिवारी सायंकाळी न्हावी गावाच्या शेत शिवारात असलेल्या सुनील फिरके यांच्या शेतविहिरीत अनिताचा मृतदेह आढळून आला. याप्रकरणी फैजपूर पोलिसांत अकस्मात मृत्यूची नोंद करण्यात आली आहे. दरम्यान, मयत मुलीचे वडीलदेखील अद्याप बेपत्ता असून त्यांचा शोध पोलिसांकडून सुरू आहे. मुलीचे वडील सापडल्यानंतरचा नेमकं या घटनेचं गूढ समोर येणार आहे.
