धुळे (प्रतिनिधी) वैद्यकीय व्यवसायाचा परवाना नसताना दवाखाना थाटून रुग्णांच्या जीवाशी खेळणार्या धुळे जिल्ह्यात सात डॉक्टरांवर पोलिसांनी छापेमारी करीत गुन्हे दाखल केल्याने बोगस डॉक्टरांच्या वर्तुळात प्रचंड खळबळ उडाली आहे. मुन्नाभाई डॉक्टरांच्या दवाखान्यातून मोठ्या प्रमाणावर अॅलॉपॅथीचा औषधांचा साठा जप्त करण्यात आला आहे. गुन्हा दाखल झालेल्या डॉक्टरांमध्ये पिंपळनेरच्या चार तर शिरपूर शहरासह तालुक्यात दोन व सोनगीरच्या एका डॉक्टरांचा समावेश आहे. धुळे जिल्हा पोलिस अधीक्षक श्रीकांत धीवरे यांच्या मार्गदर्शनाखाली ही कारवाई पोलिसांनी कारवाई करीत तोतया डॉक्टरांवर गुन्हे दाखल केले.
यांच्याविरोधात दाखल झाला गुन्हा !
असी तबसुम विश्वास (वार्सा, ता.साक्री), संभाजी माधवराव सोनवणे (70, उमरे, ता.साक्री), योगेश चंद्रकांत पाटील (24, गोपालनगर, भगवान महावीर भवनाजवळ, पिंपळनेर), राकेश प्रकाश पाटील (28,गगोपालनगर, भगवान महावीर भवनाजवळ, पिंपळनेर) यांच्याविराोधात साक्री पोलिस ठाण्यात गुन्हा दाखल करण्यात आला तर विजयसिंग धुडकू बडगुजर (52, बन्सीलाल नगर, शिरपूर), धीरज रोहिदास अहिरे (33, मोतीवाला होमिओपॅथीक, गंगापूर रोड, नाशिक, ह.मू.भामपूर) यांच्याविरोधात अनुक्रमे शिरपूर तालुका व शिरपूर शहर पोलिसात तसेच सागर विजय बिश्वास (47, अकोला, ह.मु.सोनगीर) यांच्याविरोधात सोनगीर पोलिसात गुन्हा दाखल करण्यात आला.
