जयपूर (वृत्तसंस्था) राजस्थानच्या जयपूरमध्ये बापानेच मुलीच्या शाळेच्या व्हॉट्सअॅप ग्रुपमध्ये १० अश्लील व्हिडीओ टाकल्याची धक्कादायक घटना घडली आहे. दरम्यान, आरोपी बापाला अटक करण्यात आलीय.
जयपूरमधील या घटनेत आपल्या मुलीच्या शाळेच्या व्हॉट्सअॅप ग्रुपमध्ये चुकून एका बापाने १० अश्लील व्हिडीओ टाकले गेले होते. धक्कादायक म्हणजे ऑनलाईन क्लास सुरु असतांना ग्रुपमध्ये हे अश्लील व्हिडिओ पाहून सर्वच विद्यार्थी आणि शिक्षक हादरले. यानंतर शाळा प्रशासनानेच पोलिसांकडे तक्रार दिली. त्यानुसार जयपूरच्या मुहाना परिसरातील कल्याणपूरच्या शासकीय शाळेचे मुख्याध्यापक राम प्रसाद चावला यांनी मुहाना पोलीस स्टेशनमध्ये पॉक्सो कायद्या अंतर्गत गुन्हा दाखल केला. तपासात असे आढळून आले की, इयत्ता पाचवीच्या विद्यार्थिनीच्या वडिलांच्या मोबाइलवरुन हे अश्लील व्हिडिओ शाळेच्या ग्रुपमध्ये आले आहेत. पोलिसांनी आरोपी वडील साबीर अलीला अटक केली आहे. दरम्यान, मोबाईलमध्ये हे अश्लील व्हिडीओ कुठून तरी आले होते आणि चुकून शाळेच्या ग्रुपमध्ये गेले, असा दावा आरोपीने केला.
