शिर्डी (वृत्तसंस्था) येथील कालिकानगर भागात एका सतरा वर्षीय तरुणीची तिच्या सख्ख्या भावानेच डोक्यात सिमेंटचा पेव्हर ब्लॉक घालून खून केल्याचा खळबळजनक प्रकार समोर आला आहे. दरम्यान, खून केल्यानंतर फरार झालेल्या भावाला येवला पोलिसांनी पकडून शिर्डी पोलिसांच्या ताब्यात दिले.
याबाबत अधिक असे की, २ मे रोजी सायंकाळी कालिकानगर जवळील सौंदडीबाबा मंदिराजवळ एका सतरा वर्षीय युवतीचा डोक्यात सिमेंटचा पेव्हर ब्लॉक घालून डोक्याचा व चेहऱ्याचा चेंदामेंदा करुन अज्ञात व्यक्तीने खून केला होता. याप्रकरणी मुलीचे आजोबा प्रवीण काशिनाथ विसपुते (वय ६५) यांनी फिर्याद दिली होती. खबर मिळताच पोलिस निरीक्षक नंदकुमार दुधाळ, सहायक पोलिस निरीक्षक संभाजी पाटील, प्रवीण दातरे, मकासरे, राजेंद्र बिरदवडे तत्काळ घटनास्थळी दाखल झाले. आजूबाजूच्या रहिवाशांकडे गोपनीय पद्धतीने चौकशी करताना मुलीचा मोठा भाऊ श्रुत नवनाथ कुलथे (वय १९) याच्यावर पोलिसांचा संशय बळावला.
पोलिस अधीक्षक राकेश ओला, अपर अधीक्षक स्वाती भोर, उपविभागीय अधिकारी संजय सातव यांच्या मार्गदर्शनाखाली पोलिस निरीक्षक नंदकुमार दुधाळ यांनी आरोपीच्या शोधासाठी इतर पोलिस ठाण्यांना सतर्क केले. या आरोपीचा शोध घेताना येवला पोलिस ठाण्याचे पोलिस निरीक्षक पवार यांना पेट्रोलिंग करताना पायाला रक्ताचे डाग असलेला मोटारसायकलस्वार दिसला. पोलिसांनी त्याला थांबवून चौकशी केली पोलिस कर्मचारी पिसाळ यांनी अधिक चौकशी केली असता त्याने आपले नाव, गाव सांगून बहिणीशी वाद झाल्याने तिच्या डोक्यात दगड घालून खून केल्याचे सांगितले. शिर्डी पोलिसांनी येवला येथे जाऊन आरोपीला ताब्यात घेतले. पोलिस निरीक्षक नंदकुमार दुधाळ पुढील तपास करत आहेत. दरम्यान, सख्ख्या भावाने अत्यंत निर्घृणपणे बहिणीचा खून केल्यामुळे समाजमन सुन्न झाले आहे. तर श्रुतने बहिणीचा खून का केला ?, याचे कारण आता पोलीस चौकशीत समोर येणार आहे.
