पुणे (वृत्तसंस्था) राज्यात एकनाथ शिंदे यांनी शिवसेनेविरोधात बंड केल्यानंतर राज्यभरात शिवसैनिक आक्रमक झाले आहेत. पुण्यातील संतप्त कार्यकर्त्यांनी आमदार तानाजी सावंतांच्या कार्यालयावर हल्लाबोल करत तोडफोड केली आहे.
पुणे येथील शिवसैनिकांकडून आमदारांच्या कार्यालयाची तोडफोड केली जात आहे. पुण्यातील बालाजी नगर भागात असणाऱ्या तानाजी सावंत यांच्या कार्यालयावर शिवसेनेच्या कार्यकर्त्यांनी हल्ला चढवत तोडफोड केली आहे. यामध्ये तानाजी सावंत यांच्या कार्यालयाचे मोठे नुकसान देखील झाले आहेत. यामुळे सध्या परिसरात वातावरण तापलं आहे. ही तोडफोड नेमकी कोणी केली याचा तपास पोलिसांकडून केला जात आहे.
दुसरीकडे तानाजी सावंत आणि त्यांचे कात्रज येथील मुख्य कार्यालय आणि आणि घराबाहेर देखील पोलीस बंदोबस्त वाढवण्यात आला आहे. सावंत हे सत्ता होती तेव्हा शिवसेनेत होते. सर्व पद उपभोगली आणि आता पक्षाशी गद्दारी केली, असा आक्रोश करत आक्रमक भूमिका केला आहे. गद्दारांना धडा शिकवण्याची सुरूवात पुण्यात झाली आहे, आता संपूर्ण महाराष्ट्रात या प्रकारे आंदोलन केले जाईल असा इशारा संतप्त शिवसैनिकांनी दिला आहे.
