पाचोरा (प्रतिनिधी) अवैधरित्या वाळूची वाहतुक करणाऱ्या ट्रॅक्टर अडविणाऱ्या तलाठ्याला धक्काबुक्की करीत कानशिलात लगाविल्याची घटना बुधवारी रात्री साडेनऊ वाजेच्या सुमारास घडली. तसेच वाळू माफियांनी तलाठ्यास तु काय मोठा तहसिलदार लागुन गेला का? असे म्हणत लोटुन दिले आणि ट्रॅक्टर चालकाला तू ट्रॅक्टर घेऊन जा मी पुढे बघुन घेईल, असे म्हणत ट्रॅक्टर पळवून घेवून नेला. याप्रकरणी चार जणांविरुद्ध पाचोरा पोलीस ठाण्यात गुन्हा दाखल करण्यात आला आहे.
तलाठी रामचंद्र पाटील यांनी दिलेल्या तक्रारीनुसार दि. १६ ऑगस्ट रोजी गोराडखेडा तलाठी आशिष काकडे व गिरड तलाठी राहुल पवार हे अंतुर्ली वडगाव टेक कडुन गोराडखेडाकडे एक ट्रॅक्टर अवैद्यरित्या गौण खणिज वाहतुक करीत असल्याची माहिती मिळाली. त्यानुसार तलाठी रामचंद्र पाटील हे या दोघे तलाठ्यांबरोबर रात्री ९:३० वाजेच्या सुमारास गोराडखेडा शिवारातिल बिल्दी धरणाच्या आउटलेट परिसरात गस्त घालत होते.
यावेळी निळ्या रंगाचे विना नंबरचे ट्रॅक्टर आढळुन आले. ट्रॅक्टर चालकाला त्याचे नाव विचारले असता त्याने मुस्ताक पिंजारी असे सांगितले. ट्रॅक्टरमध्ये असलेल्या वाळू वाहतुकीचा परवाना विचारला असता त्याच्याजवळ आढळुन आला नाही. ट्रॅक्टर मालकाचे नाव विचारले असता अविनाश पाटील असे सांगितले. हे ट्रॅक्टर तहसिल कार्यालय पाचोरा येथे घेउन चल असे सांगुन ते ट्रॅक्टर पाचोऱ्याला नेत असतांना दुचाकीवर अविनाश पाटील, सुनिल पाटील व एक अनोखी व्यक्ती होता. अविनाश पाटील याने ट्रॅक्टर घेऊन जाऊ नका असे म्हणत आरडा ओरड केली.
अविनाश पाटील याने तलाठी रामचंद्र पाटील यांना तू काय मोठा तहसिलदार लागुन गेला का ? असे म्हणत त्यांच्या कानशिलात लगावली. तसेचव धक्काबुक्की करत लोटुन दिले आणि ट्रॅक्टरसह पळुन गेले. तलाठी रामचंद्र पाटील यांनी पोलिसात तक्रार दिली असून त्यानुसार चार जणांविरुद्ध गुन्हा दाखल करण्यात आला आहे. पुढील तपास पोलीस उपनिरिक्षक योगेश गणगे करीत आहे.
