नवी दिल्ली (वृत्तसंस्था) सध्या कोरोना रूग्णांची संख्या मोठ्या प्रमाणात वाढत चालली आहे. कोरोना फोफावत चालला असून देशात गंभीर परिस्थिती निर्माण झाली आहे. वाढत्या रूग्णांच्या संख्येमुळे बेडची कमतरता पडू लागली आहे. यामध्ये सामन्य लोकांनाच नाही तर मंत्र्यानाही बेडसाठी ताटकळत रहावं लागत असल्याचं दिसत आहे. केंद्रीय रस्ते वाहतूक राज्यमंत्री जनरल व्ही.के. सिंग यांनी आपल्या भावाला बेड मिळाला नाही त्यामुळे बेड उपलब्ध करून देण्यासाठी ट्विट केलं आहे.
केंद्रीय रस्ते वाहतूक राज्यमंत्री व्ही. के. सिंग यांनी गाझियाबादच्या जिल्हाधिकाऱ्यांना टॅग करुन ट्विट केलं आहे. आमची मदत करा, माझ्या भावाला कोरोना संसर्ग झालेला असून त्याच्या उपचारासाठी बेडची आवश्यकता आहे. गाझियाबादमध्ये बेडची व्यवस्था होत नाही. कृपया तुम्ही लक्ष घाला असं आवाहन व्ही.के. सिंग यांनी केलं आहे. व्ही. के. सिंग यांनी यामध्ये मुख्यमंत्री योगी आदित्यनाथ यांचे माहिती सल्लागार शलभ त्रिपाठी आणि भाजपचे प्रदेश उपाध्यक्ष पंकज सिंह यांना टॅग केलं आहे. उत्तर प्रदेशात केंद्रीय मंत्र्यांच्या नातेवाईकाला बेड मिळत नसल्याचं या ट्विटमुळं समोर आलं आहे.
दरम्यान, काही वेळानंतर हे ट्वीट डिलिट करण्यात आलं असून यावर मंत्र्यांनी स्पष्टीकरण दिलं आहे. भावाला बेड उपलब्ध झाल्याचे त्यांनी या ट्वीटमध्ये म्हटले आहे.
