धनबाद (वृत्तसंस्था) देशात सध्या हिंदुत्व आणि हिंदूंचा मुद्दा चांगलाच जोर धरत असल्याचे दिसत आहे. कारण झारखंडच्या धनबादमध्ये एका युवकाला भाजपा (BJP) कार्यकर्त्यांकडून जबरदस्तीने ‘जय श्री राम’च्या घोषणा द्यायल्या लावत मारहाण करण्यात आली. एवढंच नव्हे तर त्यांनी संबंधित युवकाला माफी मागायला भाग पाडून जमिनीवरील थुंकी चाटायला लावली (forced to lick spit) आहे.
मिळालेल्या माहितीनुसार, पंतप्रधान नरेंद्र मोदी यांच्या सुरक्षेत झालेल्या कुचराईनंतर धनबादमध्ये भाजपकडून ‘सद्बुद्धी मौन आंदोलन’चं आयोजन करण्यात आलं होतं. याठिकाणी वाहतूक पोलिसांचा ताफाही घटनास्थळी तैनात होता. भाजपचे धनबादचे खासदार पीएन सिंह आणि भाजप आमदार राज सिन्हा यांनी देखील या कार्यक्रमाला हजेरी लावली होती. दरम्यान येथील एका व्यक्तीने भाजपच्या प्रदेश अध्यक्षांना गोळी मारण्याची धमकी दिली. तसेच अपशब्द वापरले.
यानंतर, संतापलेल्या भाजपच्या काही कार्यकर्त्यांनी संबंधित व्यक्तीला बेदम मारहाण केली. तसेच त्याला उठाबशा काढायला लावल्या. एवढ्यावर मन भरलं नाही म्हणून भाजप कार्यकर्त्यांनी संबंधित व्यक्तीला मारहाण करत त्याला जमिनीवरील थुंकी चाटायला भाग पाडलं आहे. तसेच ‘जय श्री राम’च्या घोषणा द्यायला लावलं आहे.
या धक्कादायक प्रकारानंतर अद्याप कोणीही पोलिसांत तक्रार दाखल केली नाही. मात्र या घटनेचे फोटो आणि व्हिडीओज व्हायरल झाल्यानंतर, या घटनेची दखल झारखंडचे मुख्यमंत्री सीएम हेमंत सोरेन यांनी घेतली आहे. तसेच ट्विट करून पोलिसांना कडक कारवाई करण्याचे निर्देश दिले आहेत. शांततेत जीवन जगणाऱ्या झारखंडवासीयांच्या राज्यात शत्रुत्वाला जागा असू शकत नाही, असं त्यांनी आपल्या ट्विटमध्ये म्हटलं आहे.
