जळगाव (प्रतिनिधी) शिवसेनेचे उपमहापौर कुलभूषण पाटील यांच्यावर रविवारी रात्री गोळीबार झाला होता. या प्रकरणी रामानंद पोलिसात चौघांविरोधात गुन्हा दाखल झाला असून दोन संशयितांना आज जामनेर तालुक्यातून ताब्यात घेण्यात आले आहे.
या संदर्भात अधिक असे की, पिंप्राळा परिसरात पूर्ववैमनस्यातून दोन गटात झालेल्या वादात मध्यस्थी करुन तो वाद सोडविल्याच्या रागातून एका गटाच्या चार जणांनी रविवार २५ जुलै रोजी रात्री साडेनऊ वाजेच्या सुमारास उपमहापौर कुलभुषण पाटील (रा. मयुर कॉलनी, पिंप्राळा) यांच्यावर तसेच त्यांच्या घरावर गोळीबार केला. तसेच फोनवरुन दुपारी दोन वेळा जीवे मारण्याच्या धमकी दिली होती. या प्रकरणी उपमहापौर कुलभुषण पाटील यांच्या फिर्यादीवरुन मध्यरात्रीनंतर महेंद्र राजपूत, उमेश राजपूत, मंगल राजपूत व बिर्‍हाडे (पूर्ण नाव माहित नाही, चौघे रा. पिंप्राळा) यांच्या विरोधात रामानंदनगर पोलिसात प्राणघातक गुन्हा दाखल करण्यात आल आहे.
गोळीबार मागील कारण
रविवार, २५ जुलै रोजी दुपारी अडीच वाजता नितीन भिमसिंग पाटील, निलेश ठाकूर व उमेश ठाकूर यांच्या पूर्ववैमनस्यातून वाद झाला होता. याबाबत तिघेही पोलीस ठाण्यात तक्रार देण्यासाठी गेले होते. याबाबत उपमहापौर कुलभुषण पाटील यांना वादाबाबत माहिती मिळाल्याने दुपारी पाटील हे पोलीस ठाण्यात गेले. तसेच त्यांनी दोघांना गटामध्ये समझोता घडवून आणला होता. त्यानंतर सर्व जण घरी निघून गेले.
आधी फोनवरून शिवीगाळ आणि धमकी
रात्री ८ वाजून ३९ मिनिटांनी बिर्‍हाडे नावाच्या व्यक्तीने कुलभुषण पाटील यांना फोन केला. फोनवरुन बिर्‍हाडे याने पाटील यांना दुपारी पोलीस ठाण्यात समझोता घडवून आणला, नितीन राजपूत याला माझ्याकडे आणणार होता, आम्ही त्याला सोडणार नाही, त्याला जीवे ठार मारु व तू मध्ये पडला तर तुझाही गेम करु, अशी धमकी दिली होती. यावेळी उपमहापौर पाटील यांनी भानगडी करुन नका, आपण उद्या भेटू असे सांगितले. यावेळी बिर्‍हाडेने शिवीगाळ केल्याने पाटील यांनी फोन कट केला. त्यानंतर रात्री ८ वाजून ५५ मिनिटांनी पुन्हा उपमहापौर पाटील यांना फोन केला. तु कुठे आहे ते आम्हाला माहिती आहे. तु फार मोठा नेता झाला आहे, तुला फार समाज कार्याची पडली आहे, तुला अशा भांडणी मिटविण्यामध्ये मोठे वाटते, आज आम्ही तुझा गेम करु, उद्याचे पेपर मोठे मोठ बातम्यांनी भरलेले असतील परंतू ते वाचालया तु जीवंत राहणार नाही, अशी धमकी फोनवरुन बोलणार्‍या व्यक्तीने दिली.
असा केला गोळीबार
रात्री ९ वाजेच्या सुमारास उपमहापौर कुलभुषण पाटील त्यांचा मित्र अनिल जनाप्रसाद यादव यांच्यासोबत घराकडे येत होते. पिंप्राळा हुडकोरोडवरील जुन्या लाकडाची वखारजवळ एका चारचाकीने दुचाकी अडविली. दुचाकीचा काचा खाली करुन गाडीतील महेंद्र राजपूत, उमेश राजपूत, मंगल राजपूत या तिघांनी कुलभुषण पाटील यांच्या दिशेने पिस्तोल रोखून शिवीगाळ करत दमदाटी केली. व आज तुझा गेम करणार तुला जीवंत सोडणार नाही धमकी दिली. या प्रकाराने भयभीत झालेले कुलभुषण पाटील दुचाकीने घराकडे येण्यात निघाले. संबंधित चारचाकीने त्यांचा घरापर्यंत पाठलाग केला. उपमहापौर पाटील यांनी त्यांच कुटुंबियांना घरात जायचे सांगून, स्वतः पाटील हे घराच्या बाजूने पळाले. त्यानंतर पाठलाग करणारी चारचाकी मयुर कॉलनी येथील उपमहापौर कुलभुषण पाटील यांच्या घराजवळ आली. याठिकाणी कुलभुषण पाटील यांच्या घरावर तसेच पाटील यांच्यावर असे एकूण तीन वेळा चारचाकीतून उतरलेल्या चौघा संशयितांनी गोळीबार केला. आणि कोणी मध्ये आल्यास त्यांनाही मारु अशी धमकी तसेच शिवीगाळ केली. गल्लीतील इतर नागरिकांनी गर्दी केल्याने संशयित चारचाकी घेवून निघून गेले. अशी फिर्याद उपमहापौर कुलभुषण पाटील यांनी दिली असून त्यावरुन रात्री साडेबारा वाजेच्या सुमारास रामानंदनगर पोलिसात महेंंंद्र राजपूत, उमेश राजपूत, मंगल राजपूत व बिर्‍हाडे पूर्ण नाव माहित नाही, चौघ रा. पिंप्राळा यांच्याविरोधात गुन्हा दाखल झाला आहे. पुढील तपास सहाय्यक पोलीस निरिक्षक संदीप परदेशी हे करीत आहेत.
जामनेर तालुक्यातून दोघं ताब्यात
उपमहापौर कुलभूषण पाटील यांच्यावर काल रविवारी रात्री गोळीबार करणार्‍या चारजणांपैकी दोन संशयितांना आज दुपारी रामानंदनगर पोलीसांनी जामनेर तालुक्यातील मालखेडा येथून ताब्यात घेतले आहे. त्यांची कसून चौकशी सुरू आहे. उमेश पांडूरंग राजपूत आणि किरण शरद राजपूत (रा. पिंप्राळा जळगाव), असे ताब्यात घेतलेल्या तरुणांची नावं असल्याचे कळते.
