सोलापूर (वृत्तसंस्था) सोलापूरचे उपमहापौर राजेश काळे यांना दोन वर्षांसाठी सोलापूर, उस्मानाबाद आणि पुणे जिल्ह्यातील इंदापूर येथून तडीपार करण्यात आले आहे. सोलापूरचे पोलीस आयुक्त हरीश बैजल यांनी हे आदेश काढले आहेत.
सोलापूरचे विद्यमान उपमहापौर राजेश काळे हे सातत्याने वादग्रस्त ठरले आहेत. जुळे सोलापूर भागातून भाजपाकडून निवडून आल्यानंतर त्यांना पक्षाने उपमहापौरपदाची संधी दिली होती. पण राजकीय पदाचा दुरूपयोग करून नियमबाह्य पध्दतीने कामे करण्यासाठी दबावतंत्राचा वापर करणे, व्यावसायिकांना धमकावून खंडणी मागणे, शासकीय अधिकारी व कर्मचाऱ्यांना ॲट्रासिटी कायद्याखाली गुन्हा दाखल करण्याची धमकी देणे, शासकीय कामकाजात अडथळा आणणे आदी विविध सात गंभीर गुन्हे काळे यांच्यावर नोंद आहेत. त्याची दखल घेऊन पोलीस आयुक्त हरीश बैजल यांच्या आदेशानुसार पोलिसांनी काळे यांच्यावर सोलापूर, उस्मानाबाद आणि इंदापूर (जि. पुणे) येथून दोन वर्षांसाठी तडीपारीची कारवाई केली आहे.
उपमहापौर राजेश काळे हे सोलापूर महानगरपालिकेत सत्ताधारी असलेले भाजपचे नगरसेवक आहेत. त्यांच्यावर सोलापूर पोलीस आयुक्तालयासह अन्य काही पोलिस स्थानकात देखील गुन्हे दाखल आहेत. तसेच राजेश काळे यांच्यावर पुण्यात आर्थिक फसवणूक केल्याप्रकरणी निगडी व पिंपरी-चिंचवड पोलिसांतही दोन गुन्हे नोंद आहेत.
