धरणगाव (प्रतिनिधी) तालुक्यातील चांदसर गावात दारू पिण्यावरून झालेल्या वादातून मुलाने आपल्या ७५ वर्षीय वडिलांवर लोखंडी विळ्याने हल्ला करून त्यांची हत्या केल्याची धक्कादायक घटना घडली आहे. या घटनेत गंभीर जखमी झालेल्या वडिलांचा उपचारादरम्यान मृत्यू झाला असून पोलिसांनी आरोपी मुलाला अटक केली आहे. मृत वडिलांचे नाव छगन यादव कोळी (वय ७५) असे असून, अटक करण्यात आलेल्या मुलाचे नाव समाधान छगन कोळी (वय ४२) आहे.
मिळालेल्या माहितीनुसार, ५ ऑगस्ट रोजी रात्री १० वाजता समाधान कोळी दारू पिऊन घरी आला. याचवेळी दारू पिण्याच्या कारणावरून वडील छगन कोळी यांच्यासोबत त्याचा वाद झाला. वाद तीव्र होऊन समाधान कोळी संतप्त झाला आणि त्याने लोखंडी विळ्याने वडिलांच्या पोटावर वार केला. यात छगन कोळी गंभीर जखमी झाले.
जखमी अवस्थेत त्यांना तातडीने जळगाव येथील शासकीय वैद्यकीय महाविद्यालयात दाखल करण्यात आले. मात्र, उपचार सुरू असतानाच ११ ऑगस्ट रोजी पहाटे ३ वाजता त्यांचा मृत्यू झाला. या प्रकरणी धरणगाव पोलीस ठाण्यात त्याच दिवशी दुपारी अडीच वाजता समाधान कोळीविरोधात खुनाचा गुन्हा दाखल करण्यात आला असून, त्याला अटक करण्यात आली आहे. पुढील तपास सहाय्यक पोलीस निरीक्षक प्रशांत खंडारे करत आहेत.
