धरणगाव प्रतिनिधी – दिनांक: ०१ सप्टेंबर २०२५
गणेशोत्सव २०२५ पार्श्वभूमीवर धरणगाव नगरपरिषदेच्यावतीने पर्यावरणपूरक गणेश विसर्जनासाठी शहरात विविध ठिकाणी कृत्रिम विसर्जन तलाव व मूर्ती संकलन केंद्रांची स्थापना करण्यात आली आहे. ही व्यवस्था सार्वजनिक व घरगुती गणेशमूर्ती विसर्जनासाठी करण्यात आली असून नागरिकांनी या सुविधांचा लाभ घ्यावा, असे आवाहन मुख्याधिकारी रामनिवास झंवर यांनी केले आहे.
विसर्जनासाठी खालील ठिकाणी कृत्रिम तलाव व मूर्ती संकलन केंद्रे उपलब्ध आहेत:
- द्वारकादास विहीर
- तेली तलाव
- वाणी मंगल कार्यालय
धातू व प्लास्टर ऑफ पॅरिस (POP) च्या मूर्तींपासून पर्यावरणाला होणारे नुकसान टाळण्यासाठी मूर्ती संकलन केंद्रांवर अशा मूर्ती वेगळ्या ठेवण्यात येणार आहेत. नगरपरिषदेच्या कर्मचारी व स्वयंसेवकांमार्फत हे संकलन करण्यात येईल.
सुरक्षितता व स्वच्छता:
विसर्जन स्थळी पोलीस बंदोबस्त, आरोग्य कर्मचारी, स्वयंसेवक, आणि साफसफाईसाठी विशेष पथके नियुक्त करण्यात आली आहेत. तसेच नागरिकांनी विसर्जन करताना कोणत्याही प्रकारचे प्लास्टिक, सजावट साहित्य जलस्रोतात न टाकता, दिलेल्या निर्माल्य कलशामध्येच टाकावे.
सर्व गणेशभक्त व नागरिकांना जाहीर आवाहन:
गणपती विसर्जन करताना शक्य असल्यास पर्यावरणपूरक मूर्तींचा उपयोग करावा. विसर्जनासाठी दिलेल्या कृत्रिम तलावांचा वापर करून पर्यावरण रक्षणात सहकार्य करावे.
