मुंबई (वृत्तसंस्था) बॉलिवूड अभिनेता सुशांत सिंह राजपूत प्रकरणाला आता पुन्हा वेगळं वळण मिळालं आहे. सुशांतने आत्महत्या केली असा रिपोर्ट देणाऱ्या एम्सच्या डॉक्टरांची ऑडिओ क्लिप लीक झाली आहे. यामध्ये सुशांतची हत्या झाली असं सांगितलं जातं आहे. ही ऑडिओ क्लिप एम्सचे डॉ. सुधीर गुप्ता यांची असल्याची सांगितली जाते आहे.
सुशांतच्या फॉरेन्सिक रिपोर्टचा अहवाल देणाऱ्या एम्सच्या समितीचे डॉ. सुधीर गुप्ता प्रमुख आहेत. टाइम्स नाऊने सुधीर गुप्ता यांची ऑडिओ क्लिप आपल्या हाती लागल्याचा दावा केला आहे. यामध्ये डॉ. सुधीर गुप्ता म्हणाले, जेव्हा सर्वात आधी फोटो आपल्यासमोर आले तेव्हा ते पाहून सुशांतची हत्या झाली होती असंच वाटतं. ही ऑडिओ टेप सुशांतचा फोटो पाहिल्यानंतरची असल्याचं सांगितलं जातं आहे, मात्र तपासानंतर ही हत्या नसून आत्महत्या असल्याचं सांगण्यात आलं आहे आणि त्यानंतर ही ऑडिओ क्लिप समोर आली.
काही दिवसांपूर्वीच एम्सने सुशांतच्या हत्येची थिएरी नाकारली. सुशांतने आत्महत्याच केली असा रिपोर्ट एम्सच्या समितीने सीबीआयला सुपूर्द केला आहे. एम्सच्या रिपोर्टबाबत सुशांतचं कुटुंबही समाधानी नाही. आता ही ऑडिओ क्लिप समोर आल्यानंतर याबाबत सुशांतच्या कुटुंबाने स्पष्टीकरण मागितलं आहे.
