धरणगाव (प्रतिनिधी) सुमारे ११ लाख रुपये घेऊन जाणाऱ्या एरंडोल तालुक्यातील फरकांडे येथील कापूस व्यापारी स्वप्नील रत्नाकर शिंपी खून प्रकरणी अटकेतील सहाही आरोपींना आज न्यायालयाने १३ डिसेंबरपर्यंत पोलीस कोठडी सुनावली आहे. दरम्यान, पोलीस कोठडी मिळण्यासाठी तपासधिकारी पोलीस निरीक्षक शंकर शेळके यांनी आज स्वत: काही प्रभावी मुद्दे कोर्टासमोर मांडले.
फरकांडे येथील कापूस व्यापारी स्वप्नील रत्नाकर शिंपी यांची कार पाळधी पेट्रोल पंपाजवळ २६ नोव्हेंबरला रात्री ८ वाजेच्या सुमारास तीन दुचाकीवर आलेल्या चौघांनी अडवत चाकूने भोसकून खून केला होता. या प्रकरणी १) नटवर किशोर जाधव (वय ३९ वर्षे रा. शिवकॉलनी, शिरुडनाका अमळनेर ता अमळनेर जि.जळगाव) २) कुणाल ऊर्फ सदाशिव वाणी (वय ४० वर्षे रा. चौगुले प्लॉट शनिपेठ, जळगाव), ३) विक्रम राजु सारवान (वय ३२ वर्षे रा. गुरु नानक नगर, शनिपेठ जळगाव) ,४) अंकुश किसन गवळी (वय ३६ वर्षे रा. गवळीवाडा, शनिपेठ, जळगाव) , ५) सनी धर्मराज पवार (वय २३ वर्षे रा. गुरुनानक नगर, शनिपेठ जळगाव), ६) अशोक जगदीश प्रजापत (वय २९ वर्षे रा.प्रजातप नगर, मुमुराबादरोड, जळगाव). या सहा जणांविरुद्ध गुन्हा दाखल करण्यात आला आहे. यातील नटवर जाधव हा पोलीस कर्मचारी असून तोच या गुन्ह्याचा मास्टर माइंड असल्याचे पोलीस तपासात समोर आलेले आहे.
सोमवारी ओळख परेड, मंगळवारी मागितली पोलीस कोठडी
संशयित आरोपींना अटक केल्यानंतर पोलिसांनी सर्व आरोपींची पोलीस कोठडीचा अधिकार राखून ठेवत न्यायलयीन कोठडीची विनंती कोर्टाकडे केली होती. त्यानुसार कोर्टाने १३ डिसेंबरपर्यंत न्यायालयीन कोठडी सुनावली होती. परंतू सोमवारी (६ डिसेंबर) रोजी सहाही आरोपींची ओळख परेड झाल्यानंतर पोलिसांनी तात्काळ मंगळवारी सर्व आरोपींना कोर्टात हजर करत ७ दिवसांची पोलीस कोठडी मागितली. त्यावर न्यायालयाने न्यायालयाने १३ डिसेंबरपर्यंत अशी ६ दिवसांची पोलीस कोठडी सुनावली आहे. दरम्यान, पोलीस कोठडीत आरोपींकडून पोलीस पुढील चौकशी करतील. तसेच आरोपींकडून पुन्हा एकदा घटनाक्रम जाणून घेतील. त्यानंतर दोषारोप पत्र तयार केले जाईल.
तपासधिकारी पो.नि. शंकर शेळके यांनी मांडले प्रभावी मुद्दे
आरोपींना ७ दिवसांची पोलीस कोठडी मिळावी म्हणून तपासधिकारी पो.नि. शंकर शेळके यांनी स्वत: न्यायालयासमोर मुद्दे मांडले. तसेच बचावपक्षाचे मुद्दे खोडून काढले. आरोपींच्या मोबाईल सीडीआरमधून महत्वपूर्ण माहिती मिळू शकते, असे सरकारी पक्षाचे म्हणणे होते. त्यावर बचाव पक्षाने मोबाईल सीडीआर काढण्यासाठी पोलीस कोठडीची गरज काय?, असे सांगितले. त्यावर तपासधिकारी पो.नि. शेळके यांनी सीडीआर आधीच काढलेला आहे. परंतू कोणत्या आरोपीला कुणाचा फोन आला किंवा त्याने कुणाला फोन लावला? याची माहिती स्वत: आरोपीच देऊ शकतो. त्यामुळे पोलीस कोठडी गरजेची असल्याचे न्यायालयाला सांगितले. तर ओळख परेडमध्ये चारच आरोपींना ओळखण्यात आल्यामुळे उर्वरित दोन आरोपींच्या पोलीस कोठडीची गरज नाही. यावरही तपासधिकारी पो.नि. शेळके यांनी सांगितले की, ओळख परेडशी पोलिसांचा काहीही संबंध नाही. त्याचा अहवाल अद्याप आमच्याकडे आलेला नाहीय. तसेच मूळ फिर्यादीत चार आरोपी होते. त्यानंतर इतर दोन आरोपी कटात सहभागी असल्याचे निष्पन्न झाले आहेत. त्यामुळे अगदी वाढीव कलमांची परवानगी न्यायालाकडून घेण्यात आली आहे. दरम्यान, तपासधिकारी म्हणून पो.नि. शंकर शेळके यांनी न्यायालयात आरोपींच्या पोलीस कोठडीसाठी न्यायालयासमोर मांडलेल्या मुद्यांची कोर्टाच्या आवारात एकच चर्चा होती.
