चाळीसगाव प्रतिनिधी : शिवसेना ठाकरे गटाचे नेते तथा माजी खासदार उन्मेश पाटील यांच्या थकीत रक्कम, एनपीए खाते आणि जाहीर नोटीसीमुळे अडचणीत मोठी भर पडली आहे. छत्रपती संभाजीनगर येथील देवगिरी नागरी सहकारी बँकेच्या चाळीसगाव शाखेतून उमंग व्हाईट गोल्ड प्रायव्हेट लिमिटेड या कंपनीच्या नावावर काही वर्षांपूर्वी कोट्यवधी रुपयांचे औद्योगिक कर्ज घेण्यात आले होते. मात्र, मुदतीत परतफेड न झाल्याने संबंधित खाते एनपीए म्हणून घोषित करण्यात आले. त्यानंतर बँकेने कायदेशीर कारवाई करत कंपनीशी संबंधित उन्मेश पाटील यांची मालमत्ता जप्त केली आहे.
बँकेने परतफेडीसाठी अतिरिक्त मुदत दिली होती; मात्र ठरलेल्या वेळेत कर्जाची रक्कम जमा न झाल्याने पुढील कारवाईचा मार्ग अवलंबण्यात आला. दरम्यान, कंपनीचे संचालक उन्मेश पाटील तसेच संजय धनकवडे, प्रशांत वाघ आणि प्रमोद जाधव यांनी बँकेकडे गहाण ठेवलेली यंत्रसामग्री संगनमताने विकल्याचा आरोप आहे. या व्यवहारामुळे देवगिरी बँकेला कोट्यवधी रुपयांचे आर्थिक नुकसान झाल्याचे नमूद करण्यात आले आहे. देवगिरी बँकेच्या चाळीसगाव शाखेचे व्यवस्थापक जीवन राजूरकर यांनी ग्रामीण पोलीस ठाण्यात दिलेल्या तक्रारीनुसार माजी खासदार पाटील आणि इतर संशयितांविरुद्ध फसवणूक, विश्वासघात आदी कलमान्वये नोव्हेंबर २०२५ मध्ये गुन्हा दाखल करण्यात आला आहे.
जाहीर नोटीसमध्ये काय ?
बँक प्रशासनाने जप्त मालमत्तेसंदर्भात आणखी एक जाहीर नोटीस प्रसिद्ध केली आहे. चाळीसगावमधील नगर भूमापन क्रमांक २७६ या मालमत्तेबाबत कोणताही व्यवहार करू नये, असे आवाहन नागरिकांना करण्यात आले आहे. या मालमत्तेवर सुमारे सहा कोटी ६४ लाख ४५ हजार ७०० रुपये इतकी थकबाकी असून त्यासोबत मुद्दल रक्कम सहा कोटी १६ लाख ५४ हजार ८३५ रुपये आणि एक ऑक्टोबर २०२३ पासूनचे व्याज लागू राहणार असल्याचे नोटीसीत नमूद करण्यात आले आहे. या कारवाईमुळे माजी खासदार उन्मेश पाटील यांच्या अडचणीत आणखी वाढ झाली असून पुढील कायदेशीर घडामोडींवर सर्वांचे लक्ष लागले आहे.
