चंद्रपूर (वृत्तसंस्था) नागभीड शहरातील रेल्वे कॉलनी येथे लक्ष्मीपूजन झाल्यावर अंगणामध्ये फटाके उडवित असताना लावलेला फुलझाड अचानक फुटून ७ वर्षीय बालकाचा चेहरा गंभीर जखमी झाल्याची धक्कादायक घटना घडली आहे. यश विनीत चिलमवार, असे जखमी बालकाचे नाव आहे.
नागभीड शहरातील रेल्वे कॉलनी येथील रहिवासी सातवर्षीय यश विनीत चिलमवार घरच्या लक्ष्मीपूजनानंतर घराच्या अंगणातच फटाके उडविण्यास सुरुवात केली. यावेळी त्याने एक फुलझाड लावले. परंतु तो फुलझाड सरळ न जाता यशच्या चेहऱ्यावर येऊन फुटला. त्यात यशाचा चेहरा जळाला. ही बाब त्यांच्या कुटुंबीयांच्या लक्षात येताच एकच आरडाओरड सुरू झाली.
यशला लगेच ब्रह्मपुरी येथील एका खासगी रुग्णालयात उपचारासाठी नेण्यात आले. पण तेथील डॉक्टरांनी प्राथमिक उपचार करून नागपूरला हलविण्याचा सल्ला दिला.
सध्या यशवर नागपूर येथील खासगी रूग्णालयात उपचार केले जात आहे. दरम्यान, यश चिलमवार याचा चेहराच जळाल्याने त्याच्यावर प्लास्टिक सर्जरी करणे आवश्यक असल्याचे डॉक्टरांचे म्हणणे आहे. ब्रह्मपुरीतील डॉक्टरांनी प्रथमिक उपचार करून लगेच त्याला नागपूरला हलविले, तेथे यशच्या चेहऱ्यावर प्लास्टिक सर्जरी करण्यात येणार आहे.
