जळगाव प्रतिनिधी : लग्नासाठी पाळधी येथे जाणाऱ्या एका महिलेच्या पिशवीतून चोरट्यांनी धावत्या बसमध्ये ३८ ग्रॅम वजनाचे सोन्याचे दागिने चोरून नेल्याची घटना उघडकीस आली. ही घटना मंगळवारी सायंकाळच्या सुमारास नवीन बस स्थानक परिसरात घडली. याप्रकरणी जिल्हापेठ पोलीस ठाण्यात गुन्हा दाखल करण्यात आला आहे.
शहरातील पिंप्राळा येथील बारी वाडा भागातील रहिवासी सुनिता अशोक बारी (वय ५२) या दि. १० फेब्रुवारी रोजी जळगाव ते छत्रपती संभाजीनगर या बसने पाळधी (पहूर) येथे लग्नासाठी निघाल्या होत्या. सकाळी ११.४५ ते १२.५० च्या दरम्यान बसमध्ये चढत असतांना गर्दीचा फायदा घेत चोरट्यांनी सुनिता बारी यांच्या जवळील कापडी पिशवीला धारदार वस्तूने कापले. पिशवीत ठेवलेले ३२ ग्रॅम वजनाचे सोन्याचे मंगळसूत्र (पेंडंटसह) आणि ६ ग्रॅम वजनाचे सोन्याचे कानातले, असा एकूण ३८ ग्रॅम सोन्याचा ऐवज चोरट्यांनी लंपास केला. चोरी झाल्याचे लक्षात येताच महिलेने पोलिसात धाव घेतली. याप्रकरणी सुनिता बारी यांच्या तक्रारीवरून अज्ञात चोरट्याविरुद्ध जिल्हापेठ पोलीस ठाण्यात चोरीचा गुन्हा दाखल करण्यात आला आहे. घटनेचा पुढील तपास पोलीस हवालदार भटू पाटील हे करत आहेत. भरदिवसा बसमध्ये झालेल्या या चोरीमुळे प्रवाशांमध्ये भीतीचे वातावरण पसरले आहे.
