एरंडोल (प्रतिनिधी) मोठ्या मुलाच्या लग्नाची पत्रिका वाटायला गेलेल्या ग. स. सोसायटीचे प्रशासन अधिकारी महेंद्र मोरे यांचा एरंडोल येथील शाखेत हृदयविकाराने मृत्यू झाल्याची घटना मंगळवारी दुपारी घडली. या घटनेमुळे लग्न घरावर शोककळा पसरली असून घरच्यांना आणि नातेवाईकांना मोठा धक्का बसला आहे.
महेंद्र रामा मोरे (वय ५७) हे ग. स. सोसायटीत प्रशासन अधिकारी म्हणून कार्यरत होते. त्यांचा मोठा मुलगा विक्रांत याचे १ जून रोजी लग्न होते. त्यानिमित्ताने ते सकाळी चोपडा, धरणगाव, अमळनेर येथून एरंडोल येथे दुपारी पत्रिका वाटण्यासाठी ग. स. सोसायटीच्या शाखेत पोहचले. खुर्चीवर बसल्यानंतर त्यांना अस्वस्थ वाटायला लागले. त्यानंतर त्यांनी बसल्या जागी उलटी झाली. त्यांची प्रकृती बिघडल्याने त्यांच्यासोबत असलेल्या त्यांचा पुतण्या व कर्मचाऱ्यांनी तातडीने महेंद्र मोरे यांना खाजगी रुग्णालयात नेण्यात आले. त्यानंतर त्यांना जिल्हा सामान्य रूग्णालयात आणल्यानंतर तपासणीनंतर महेंद्र मोरे यांचा मृत्यू झाल्याचे डॉक्टरांनी जाहीर केले.
याप्रसंगी ग. स. कर्मचारी तसेच नातेवाईकांची रुग्णालयात गर्दी झाली होती. महेंद्र मोरे हे मूळचे नगरदेवळा (ता. पाचोरा) येथील रहिवासी आहेत. त्यांच्या पश्चात पत्नी शारदा, मोठा मुलगा विक्रांत, लहान मुलगा कुणाल असा परिवार आहे. विक्रांत पुण्यात कंपनीत तर लहान मुलगा एमबीएचे शिक्षण घेत आहे. या घटनेनंतर मुलाचे लग्न पाहण्याचे महेंद्र मोरे यांचे स्वप्न अपूर्ण राहिले. दुपारी ३.३० वाजता या घटनेची माहिती मिळताच नातेवाइकांनी प्रचंड आक्रोश केला.
