जळगाव (प्रतिनिधी) येथील बांभोरी पुलाजवळ टॅंकरला ओव्हरटेक करुन पुढे जाण्याच्या प्रयत्नात दुचाकी चालक महिलेचा तोल गेल्याने झालेल्या अपघातात मायलेकांचा जागीच मृत्यू झाल्याची घटना आज दुपारी घडली.
यासंदर्भात अधिक असे की, रुपाली पाटील या अ‍ॅक्टीव्हा चालक महिलेच्या मागे त्यांची बहिण चारुशिला राहुल पाटील व त्यांचा बारा वर्षाचा मुलगा निशांत असे तिघे जण एरंडोल येथून जळगावच्या दिशेने प्रवास करत होते. दरम्यान बांभोरी नजिक पुढे धावणा-या टॅंकरला ओव्हरटेक करण्याचा प्रयत्न रुपाली पाटील यांनी केला. या प्रयत्नात त्यांचा तोल जावून पडल्याने चारुशिला पाटील व त्यांचा मुलगा निशांत पाटील असे दोघे मायलेक टॅंकरच्या मागच्या चाकात आले. त्यात दोघे मायलेक जागीच ठार झाले. तर अ‍ॅक्टीव्हा चालक रुपाली पाटील या जखमी झाल्या आहे.
घटनेची माहिती मिळताच पाळधी दुरक्षेत्राचे सहायक पोलिस निरीक्षक गणेश बुवा व त्यांचे सहकारी हे.कॉ. संजय महाजन व पो.कॉ. चंद्रकांत चंदनकर यांनी घटनास्थळी धाव घेतली. वाहतुक सुरळीत करुन त्यांनी टॅंकर नजीकच्या जळगाव तालुका पोलिस स्टेशनला जमा केला. जखमी व मयत अशा तिघांना रुग्णालयात दाखल केले.
