अहमदनगर (वृत्तसंस्था) छत्रपती संभाजीनगर येथून केरळला इथेनॉल घेऊन जाणाऱ्या टँकरला केळवडी शिवारात चकेवाडीच्या घाटात भीषण अपघात झाल्याने पलटी होऊन टँकरला लागलेल्या आगीत एक महिला व एक युवक दोघेही टँकरखाली अडकल्याने जळून खाक झाले. सहकारी चालक गणेश रामराव पालवे, (वय ४२ रा. पालवेवाडी, ता. पाथर्डी) व सुरया बशीर शेख (रा. माळी रा. बाभुळगाव), अशी मयतांची नावे आहेत. हा अपघात गुरुवारी सकाळी साडेदहाच्या दरम्यान घडला.
याबाबत सविस्तर वृत्त असे की, दादासाहेब अंकुश केकाण (रा. पालवेवाडी) हा चालक औरंगाबाद येथून केरळला इथेनॉलचा टँकर घेऊन चालला होता. त्याच्या सोबत सहचालक गणेश रामराव पालवे हादेखील होता. पाथर्डी शहरातून गुरुवारी सकाळी १०.१५ वाजता संस्कार भवन येथून लहू पवार, सुमन पवार, कमल पवार जगदिश पवार (रा. पैठण), असे चौघेजण व सुरय्या बशीर शेख रा. माळीबाभुळगाव, असे पाच प्रवाशी टँकरमध्ये बसलेले होते.
सकाळी १०.३० वाजता केळवडी शिवारात व चेकेवाडीचा घाट सुरू होताच पहिल्याच वळणावर संरक्षक कठडे तोडून टँकर रस्त्याच्या खाली गेला व काही क्षणात टँकरने घेतला. अपघात घडताच शेजारी राहणाऱ्या आठरे कुटुंबाने धाव घेतली. रस्त्याने जाणाऱ्या अशोक गाढवे (रा. पाण्याचे धामणगाव ता. आष्टी) या मोटारसायकलस्वाराने व आठरे परिवाराने पेटलेल्या टँकरच्या समोरच्या काचा फोडल्या व कॅबिनमधील लहू पवार, सुमन पवार, कमल पवार, जगदिश पवार, असे चौघांना बाहेर काढले. दोघेजण मात्र पवार टँकरखाली सापडल्याने जळून खाक झाले.
सुरय्या शेख हिची केवळ कवटी पोलिसांना आढळली आहे. तर गणेश पालवे याचा चेहऱ्याचा काही भाग व छातीचा काही भाग मातीत मिसळलेला होता. इथेनॉल ज्वलनशील असल्याने त्याची आग पाण्याने विझवता येत नसल्याने फायर ब्रिगेडचा फारसा फायदा झाला नाही. टँकरच्या शेजारी लागेली आग मात्र विझविली गेली.
क्रेनच्या सहाय्याने टँकर सरळ केल्यानंतर एक अर्धवट जळालेला मृतदेह व एक जळालेली कवटी, असे पोलिसांना आढळले. पाथर्डीच्या उपजिल्हा रुग्णालयात उत्तरीय तपासणी करण्यात आली. दरम्यान, प्रवाशांच्या मृत्यूस कारणीभूत ठरल्याप्रकरणी टँकर चालकाविरुध्द पाथर्डी पोलिसांत गुन्हा दाखल करण्यात आला आहे.
