जळगाव (प्रतिनिधी) चाळीसगावचे आमदार मंगेश चव्हाण यांनी विशेष सरकारी वकील प्रवीण चव्हाण यांच्याविरुद्ध गुन्हा दाखल व्हावा, यासाठी जळगाव जिल्हापेठ पोलीस स्थानकात तक्रार दिली आहे.
राज्याचे विरोधी पक्षनेते देवेंद्र फडणवीस यांनी अर्थसंकल्पीय अधिवेशनात विशेष सरकारी वकील प्रवीण चव्हाण यांच्याविरोधात पेन ड्राईव्ह बॉम्ब सादर करून प्रचंड खळबळ उडवून दिली होती. शंभर तासाहून अधिकचे स्टिंग ऑपरेशनचे व्हिडीओ फुटेज संबंधित पेन ड्राईव्हमध्ये होते. यानंतर आता चाळीसगावचे आमदार मंगेश चव्हाण यांनी प्रवीण चव्हाण यांच्या विरोधात जिल्हापेठ पोलीस स्थानकात गुन्हा दाखल व्हावा म्हणून एक तक्रार केली आहे. या तक्रारीत त्यांनी नेमकं काय नमूद केलं आहे? याची अद्याप माहिती समोर येऊ शकली नाही. तर दुसरीकडे पोलीस प्रशासनाने तक्रारी अर्ज प्राप्त झाल्याबाबतच्या वृत्ताला दुजोरा दिलाय.
सूत्रांनी दिलेल्या माहितीनुसार आमदार चव्हाण यांनी गुन्हा दाखल व्हावा म्हणून केलेल्या तक्रारी अर्जासोबत काही पुरावेही दिले असल्याचे कळते. यासंदर्भात आमदार मंगेश चव्हाण यांच्याशी संपर्क साधला असता होऊ शकला नाही. दुसरीकडे या तक्रारीत आ. चव्हाण यांनी प्रवीण चव्हाण यांच्यावर नेमके कोणते आरोप लावले आहेत? याबाबतच्या चर्चेला जिल्ह्यात जोरदार उधाण आले आहे. तर आमदार चव्हाण यांचा तक्रारीचा रोखही विरोधी पक्षनेते देवेंद्र फडणवीस यांनी सादर केलेल्या पेन ड्राईव्ह संदर्भाशीच असल्याच्या वृत्ताला सूत्रांनी दुजोरा दिला आहे. भाजप नेत्यांना खोट्या खटल्यात अडकवण्याचा प्रवीण चव्हाण आणि पोलीस अधिकारी, मंत्र्यांनी कट असल्याचा तक्रारीत आरोप केला असल्याचेही कळतेय.
