बुलढाणा (वृत्तसंस्था) किनगाव राजा शेलगाव राऊत फाट्याजवळ ३० मे रोजी सकाळी एका तरुणीचा गळा चिरलेला व अर्धवट जळालेल्या अवस्थेतील मृतदेह अढळल्याने खळबळ उडाली आहे. खून करून मृतदेह नष्ट करण्याचा प्रयत्न आरोपींनी केला.
शेलगाव राऊत फाट्यानजीक असलेल्या पिंपळगाव लेंडी शिवारातील द्वारका सुभाष गायके यांच्या गट क्रमांक १५२ मध्ये शेतातील जुन्या व पडक्या खोलीच्या मागे २० ते २५ वयोगटातील तरुणीचा अर्धवट जळालेल्या अवस्थेतील मृतदेह आढळून आला. माहिती मिळताच किनगाव राजा पोलीस स्टेशनचे ठाणेदार विनोद नरवाडे व त्यांचे सहकारी अब्दुल परसुवाले, शिवाजी बारगजे, मुंढे घटनास्थळ दाखल झाले. मृतदेहाची पाहणी केली असता तरुणीचा गळा चिरलेला व डाव्या पायाची बोटे कापलेली आढळली. डाव्या पायाला सहा बोटे असण्याची शक्यता वर्तवल्या जात आहे. अज्ञात आरोपींनी निर्जनस्थळी तिचा खून करून पिंपळगाव लेंडी शिवारात मृतदेह आणून पुरावा नष्ट करण्याचा हेतूने जाळला असल्याचा पोलिसांचा कयास आहे.
बुलढाणा येथील जिल्हा सामान्य रुग्णालयात पाठविण्यात आला आहे. ओळख पटविण्याकरिता मृतदेह शवागारात ठेवला जाणार आहे. घटनास्थळी अपर पोलीस अधीक्षक बी.बी. महामुनी, देऊळगाव राजा उपविभागीय पोलीस अधिकारी मनीषा कदम, स्थानिक गुन्हा शाखेचे पोलीस अधीक्षक अशोक लांडे, अंढेरा पोलीस स्टेशनचे ठाणेदार विकास पाटील यांनी घटनास्थळाची पाहणी केली. पुढील तपास किनगाव राजा ठाणेदार विनोद नरवाडे करीत आहेत. दरम्यान, पोलीस पाटील राहुल चव्हाण यांनी दिलेल्या फिर्यादीनुसार किनगाव राजा पोलीस ठाण्यात भादंवि कलम ३०२, २०१ अन्वये गुन्हे दाखल करण्यात आले आहे.