अमळनेर (प्रतिनिधी) मुंबईहून पाहुणी म्हणून आलेल्या भावजईने यजमानांवर भलतीच नामुष्कीची वेळ आणली. ही पाहुणी चक्क चोरटी निघाली. तिने नणंदेचेच दागिने चोरले आणि ते कुणालाही शंका नको म्हणून थेट शौचकुपात टाकले आणि तिने केलेली चोरी मोबाइलमुळे उघडकीस आली. या प्रकाराची माहीतगार व नातेवाईक मंडळीमध्ये चांगलीच चर्चा रंगली आहे.
ह्या पाहुण्या भावजईचा प्रताप असा की तिने नणंदेचेच दागिने चोरले आणि ते कुणालाही शंका नको म्हणून थेट शौचकुपात टाकले. इकडे दागिने गेल्याने घरचे हैराण झाले. त्यांनी सर्वत्र शोध घेण्याचा प्रयत्न केला. घरात बाहेरचे कुणीच आले नाही याची पक्की खात्री असल्याने त्यांनी अगदी स्वतःच्या मुलांसह सर्वांची झाडाझडती घेतली. पण हाती काहीच लागले नाही. मात्र चोर परिवारातीलच कोणीतरी असावा, या संशयाने निगराणी मात्र सुरू होती.
पाहुणी, तिचे पती (यजमान नणंदेचा भाऊ) आणि मुलांना दुसऱ्या दिवशी सकाळीच निघायचे होते, पण भावजई या नात्या कारणाने निघायचे नाव घेईना. दागिने जड असल्याने पाईपातून वाहून जाणार नाहीत आणि वातावरण शांत झाल्यावर काढून निघून जाऊ असा भावजईचा प्लॅन होता. त्यामुळे मुक्काम वाढवायचे नाटक केल्याची कबुली भावजाईने दिली. या प्रकाराची माहीतगार व नातेवाईक मंडळीमध्ये चांगलीच चर्चा रंगली आहे.
अन् भावजईने चूक केली कबूल
ज्या महिलेचे दागिने चोरीस गेले होते, त्या महिलेचा भाऊ लघुशंकेसाठी गेला अन त्याचवेळी त्याचा मोबाइल शौचकुपात पडला. मोबाइलच पाण्यात पडल्याने भाऊ अस्वस्थ झाला. त्याने अडकलेला मोबाइल काढला आणि त्या मोबाइलसोबत चक्क मंगळपोतच हाती लागली. आता मात्र पोलिसांना बोलावून हे दागिने कोणी चोरले होते याचा निर्णय झाला पाहिजे असा काहींनी हट्ट धरला. त्यामुळे घाबरून भावजईने चूक कबूल केली.
