जळगाव (प्रतिनिधी) शहरातील सिंधी कॉलनीत सुरु असलेल्या बांधकाच्या ठिकाणी चौथ्या मजल्यावर खिडकीचे ग्रील बसविण्याचे काम करतांना अचानक तोल गेल्याने मजूर चौथ्या मजल्यावरून पडून शेख वाहिद शेख रफिक ( वय – ३४ रा. शाहु नगर) हा गंभीर जखमी झाला होता. त्याच्यावर गोदावरी वैद्यकीय महाविद्यालयात उपचार सुरु असतांना चार दिवसांपासून मृत्यूशी सुरु असलेली त्याची झुंज आज अखेर अपयशी ठरली. याप्रकरणी एमआयडीसी पोलिसात अकस्मात मृत्यूची नोंद करण्यात आली आहे.
शहरातील शाहू नगरात शेख वाहिद शेख रफिक हा आई, पत्नी व दोन मुलींसह वास्तव्याला होता. बांधकामाच्या ठिकाणी इमारतीच्या खिडक्या बसविणाऱ्या ठेकेदाराकडे तो पाच वर्षापासून कामाला होता. ठेकदाराचे सिंधी कॉलनीत एका बांधकाम केलेल्या इमारतीला खिडक्या बसविण्याचे काम घेतले होते. दि. ३ ऑगस्ट रोजी या इमारतीला खिडकी बसविण्यासाठी शेख वाहिद हा देखील गेला होता. त्यावेळी दुपारच्या सुमारास खिडकी बसवितांना अचानक तोल गेल्याने तो चौथ्या मजल्यावरून खाली पडला. त्याच्यासोबत काम करणाऱ्यांसह इतर मजुरांनी जखमी शेख वाहीद याला लागलीच जखमी अवस्थेत गोदावरी वैद्यकीय महाविद्यालया उपचारार्थ दाखल केले होते.
चार दिवसांपासून त्याच मृत्यूशी सुरु असलेली झुंजर अखेर सोमवारी ७ ऑगस्ट रोजी दुपारी ३ वाजता अपयशी ठरली आणि त्यांचा उपचार सुरू असतांना मृत्यू झाला. उपचार सुरु असतांना शेख वाहीद याची प्राणज्योत मालवल्यानंतर त्याचा मृतदेह शवविच्छेदनासाठी जिल्हा शासकीय वैद्यकीय महाविद्यालयात आणण्यात आला. याप्रकरणी एमआयडीसी पोलीस ठाण्यात अकस्मात मृत्यूची नोंद करण्यात आली आहे. तरूणाच्या पश्चात आई, भाऊ पत्नी यांच्यासह दोन मुली असा परिवार आहे. मृतदेह बघितल्यानंतर परिवाराचा आक्रोश मन हेलावणारा होता.
