यावल(प्रतिनिधी ) : तालुक्यातील डोंगरकठारा जवळील डोंगरदे वस्ती पुढील पैझरीपाडा-काळाढोह येथे पसार आरोपींचा शोध घेणाऱ्या वन विभागाच्या पथकावर हल्ला, दगडफेक झाली. यात वन कर्मचारी किरकोळ जखमी झाले. याप्रकरणी शासकीय कामात अडथळा, गैर कायद्याची मंडळी जमवून दहशत माजवणे अशा विविध कलमान्वये १२ जणांविरुद्ध यावल पोलिसांत गुन्हा दाखल झाला.
पैझरीपाडा-काळाडोह भागातील कैलास बारेला याला वन विभागाने अनधिकृत वृक्षतोड करताना पकडले होते. त्याचे साथीदार मात्र पसार झाले होते. या पसार संशयितांचा शोध घेण्यासाठी वन विभागाचे पथक बुधवारी जंगलात गेले होते. वन परिक्षेत्र अधिकारी विक्रम पदमोर, वनरक्षक कृष्णा शेळके, रवींद्र तायडे, प्रकाश बारेला, गोवर्धन डोंगरे, जीवन नागरगोजे, सारंग आढाळे, महेश चव्हाण हे सर्व जण शासकीय वाहनाने पैझरी पाड्यावर पोहोचले. तेथील एका मंदिराच्या ओट्यावर काही संशयित झोपल्याचे त्यांना दिसले. पथकाने ताब्यात घेताच त्यांनी वन कर्मचाऱ्यांना मारहाण सुरू केली. यानंतर महिला, पुरुषांचा जमाव लाठ्याकाठ्या घेऊन तेथे आला. त्यातील इना कमरा बारेला यांनी हातातील काठीने गोवर्धन डोंगरे यांच्या डोक्यात वार केला. रंगी रामसिंग पावरा यांनी कृष्णा शेळके यांना मारहाण केली. त्यात कर्मचारी जखमी झाले. या पथकावर जमावाने दगडफेक देखील केली. त्यामुळे स्वतःचा जीव वाचवून पथक तेथून बाहेर पडले. याप्रकरणी यावल पोलिस ठाण्यात शासकीय कामात अडथळा आणने, दंगलीचा प्रयत्न करणे, गैर कायद्याचा जमाव एकत्रित करणे व वन अधिकारी, कर्मचाऱ्यांना मारहाण करणे या कलमान्वये १२ जणांवर गुन्हा दाखल झाला. पोलिस निरीक्षक राकेश मानगावकर यांच्या मार्गदर्शनाखाली उपनिरीक्षक विनोद खांडबहाले तपास करत आहेत.
असे आहेत संशयित
पैझरी पाड्यावर वन विभागाच्या पथकावर हल्ला केल्याप्रकरणी रंगी रामसिंग पावरा, सुरेश किसन पावरा, झामसिंग मखना बारेला, बिलरसिंग झामसिंग बारेला, प्यारसिंग झामसिंग बारेला, सखाराम झामसिंग बारेला, इना कमरा बारेला, सीमा सखाराम बारेला, रशिदा झामसिंग बारेला, मंजुराबाई सुरेश बारेला, सावळीबाई कमरू बारेला, व्यापारीबाई तुळशीराम बारेलासह दहा ते पंधरा महिला-पुरुषांवर गुन्हा दाखल झाला.
