अमळनेर (प्रतिनिधी) गुंड प्रवृत्तीच्या लोकांनी घरी येत हफ्त्याच्या वसुलीसाठी महिलांसोबत अरेरावीची भाषा वापरल्याचा आरोप करत बजाज फायनान्स (Bajaj Finance) कंपनीच्या कार्यालयात घुसून तोडफोड केल्याची घटना घडली आहे. (Jalgaon Crime News)
या संदर्भात अधिक असे की, शिंदे गटाच्या एका पदाधिकाऱ्याने बजाज फायनान्सकडून लोन घेतलं होतं. त्यांनी घेतलेल्या कर्जाचा एक हफ्ता थकला होता. हा हफ्ता भरण्याच्या मागणीसाठी बजाज फायनान्सचे कर्मचारी त्या पदाधिकाऱ्याकडे गेले होते. परंतु पदाधिकारी घरी नसताना फायनान्स कर्मचारी महिलांना अरेरावीची भाषा करुन आल्याचा आरोप त्यांच्यावर करण्यात आला. यानंतर अमळनेर शहरातील न्यू एरिया प्लॉट भागातील बजाज फायनान्सच्या कार्यालयात संध्याकाळच्या सुमारास काही कार्यकर्ते घुसले आणि मागचा पुढचा कोणताही विचार न करता त्यांनी तिथले संगणक, लॅपटॉपसह जे दिसेल त्याची तोडफोड केली.
यावेळी कार्यालयात उपस्थित कर्मचाऱ्यांना त्यांनी शिवीगाळ करत दमदाटी केल्याने त्या ठिकाणचे कर्मचारी घाबरुन कार्यालयातून पळून गेले.दरम्यान, बजाज फायनान्स कंपनीच्या कर्मचाऱ्यांनी कर्जाच्या वसुलीसाठी तगादा लावत असल्याच्या अनेक तक्रारी शेतकऱ्यांकडूनही केल्या जात आहेत. वसुलीसाठी येणारे कर्मचारी शिवीगाळ करुन पैसे भरण्यासाठी धमकावत असल्याचं शेतकऱ्यांचं म्हणण आहे. याच कारणावरुन राजकीय पक्षाच्या या पदाधिकाऱ्याने सायंकाळच्या सुमारास काही कार्यकर्त्यांना घेऊन बजाज फायनान्समध्ये प्रवेश करत त्या ठिकाणी तोडफोड केल्याचे कळते.
