सोलापूर (वृत्तसंस्था) भाजप आमदार गोपीचंद पडळकर यांच्या ताफ्यावर दगडफेक झाल्यानंतर राज्यात राजकीय वातावरण तापलं होत. अखेर त्या दगडफेक करणाऱ्या युवकाला पोलिसांनी ताब्यात घेतले असून त्याची सखोल चौकशी सुरू आहे.
सोलापुरातील गुन्हे शाखेच्या पथकाने सुरवसेसह आणखी एकाला अटक केली असल्याची माहिती असून पोलीस या प्रकरणात आता पुढील चौकशी करत आहे. गेल्या तीन दिवसांपासून हल्लेखोर अमित हा फरार होता. पण अखेर पोलिसांनी त्याला अटक केली आहे. त्यामुळे हा हल्ला त्याने का केला? असं करण्यामागे कोणाचा हात आहे का? अशा प्रश्नांचा आता उलगडा होणार आहे.
पडळकरांचा राष्ट्रवादीवर आरोप
दरम्यान या हल्ल्यानंतर गोपीचंद पडळकर यांनी राष्ट्रवादी काँग्रेस वर आरोप केले होते. पडळकरांनी राष्ट्रवादीचे आमदार रोहित पवार यांच्यासोबत त्या मुलाचा फोटो सोशल मीडियावर ट्विट करत म्हंटल होत की हा प्रस्थापितांचा बहुजनांवर हल्ला असून आम्ही अशा भ्याड हल्ल्यांनी बहुजनांचा आवाज दबणार नाही. तसेच हाच का तुमचा शाहू फुले आंबेडकरांचा विचार असा सवाल देखील पडळकरांनी केला होता.
