जळगाव (प्रतिनिधी) दुचाकीने घरी जात असलेल्या एका दुचाकीस्वाराच्या गळ्याला वायरीचा फास बसून त्यांचा गळा चिरला गेल्याची धक्कादायक घटना रविवारी रात्रीच्या सुमारास घडली. जितेंद्र विजय सोनार (वय ३८, रा. हरिओम नगर), असे गंभीर जखमी दुचाकीस्वाराचे नाव आहे. त्यांच्यावर खाजगी रुग्णालयात उपचार सुरू आहे.
शहरात अनेक भागात विद्युत तारांवर आकोडे टाकलेले आहेत. रविवारी रात्री कानळदा रस्त्यावरील या केबल थेट दुचाकीस्वाराच्या जिवावर उठल्याचा प्रकार घडला. शहरातील एका व्यसनमुक्ती केंद्रामध्ये कामाला असलेले जितेंद्र सोनार हे रविवारी रात्री कानळदा रोडवरून दुचाकीने घरी जात होते. त्यावेळी समोरून एक ट्रक जळगावकडे येत होता. त्या ट्रकमध्ये केबल, आकोडे अकडून ते थेट ट्रकसोबत ओढत आले व बाजूने जात असलेल्या सोनार यांच्या गळात अकडले. यामुळे या केबलचा दुचाकीस्वाराच्या गळ्याला अक्षरशः फास बसला व ट्रकमुळे केबल पुढे ओढत गेल्याने गळा चिरला गेल्याने जितेंद्र सोनार हे गंभीर जखमी झाले.
केबलस विद्युत तारा गळ्यात अडकून गळा चिरला गेल्याने सोनार गंभीर जखमी झाल्याचे दिसताच त्यांना परिसरातील योगेश साळी, चेतन बडगुजर यांच्यासह काही तरुणांनी धाव घेत दुचाकीस्वाराला जखमी अवस्थेत शासकीय वैद्यकीय महाविद्यालय व रुग्णालयात नेण्यात आले. परंतु सोनार हे गंभीर जखमी झाल्याने त्यांना नंतर खासगी रुग्णालयात दाखल करण्यात आले आहे. वेळीच उपचारामुळे सोनार बालंबाल बचावले आहेत.
