सांगली (वृत्तसंस्था) कापरी (ता. शिराळा) येथे पैशाच्या वादातून धाकट्या भावाने मोठ्या भावाचा लाकडी दांडके डोक्यात घालून खून केला. शनिवार, दि. ११ रोजी ११ वाजण्याच्या सुमारास घडली. महेश राजेंद्र मोरे (वय २७), असे मयताचे नाव आहे तर अविनाश राजेंद्र मोरे (वय २२), असे संशयित हल्लेखोर भाऊचे नाव असून तो फरार झाला आहे. त्याच्या शोधासाठी पोलिस पथके रवाना करण्यात आली आहेत.
मयत महेश मोरे व संशयित आरोपी अविनाश मोरे (मूळगाव हालोंडी, ता. हातकणंगले, जिल्हा कोल्हापूर. सध्या रा. कापरी, ता. शिराळा) हे दोघेही सेंट्रिंग काम करतात. दोघेही लहानपणापासून आईसह आजोळी कापरी येथे मामा व आजीकडे रहात आहेत. तर त्यांचे वडिल राजेंद्र हे गावाकडेच असतात. मयत महेश याचे लग्न झाले असून त्याचा घटस्फोट झाला आहे. महेश व अविनाश या दोघांमध्ये पैशाच्या कारणावरुन सतत वाद होत होते.
महेश कामाचे पैसे घरात देत नसल्याचा राग संशयीत अविनाशला होता. याच कारणावरून शनिवारी रात्री अविनाशचे आई व भावाबरोबर भांडण झाले. यावेळी ते घराच्या समोरील रस्त्यावर आले. तेथे संशयीत अविनाश याने रस्त्याकडेला पडलेले लाकडी दांडक्याने महेशच्या डोक्यात मारहाण केली. यामध्ये मयत तो गंभीर जखमी झाला. प्रचंड रक्तस्त्राव झाल्याने त्याचा घटनास्थळीच मृत्यू झाला. महेश निपचित पडल्याचे पाहून संशयित अविनाश घटनास्थळावरून पसार झाला. याबाबत पोलीस पाटील बजरंग कुंभार यांनी शिराळा पोलिसांत फिर्याद दिली असून तपास सहायक पोलिस निरीक्षक जयसिंगराव पाटील करत आहेत.
