जळगाव (प्रतिनिधी) वडीलांच्या उपचारासाठी फोन करणाऱ्या तरुणाची सायबर ठगांनी १० लाखात फसवणूक केल्याची घटना समोर आली. सायबर ठगांनी तरुणाकडून अपॉईमेंटसाठी बँक खात्याची माहिती घेवून शिताफीने तरूणाला १० लाखांचा चूना लावल्याची तक्रार सायबर पोलिसात दाखल करण्यात आली आहे.
जामनेर येथील खासगी क्लासेस चालक असलेले विश्वेष बाविस्कर (३३, रा. जामनेर) यांचे वडील प्रदीप बाविस्कर यांच्या उपचारासाठी त्यांना छत्रपती संभाजीनगर येथील एका रुग्णालयाच्या अपॉईंटमेंटसाठी क्रमांक हवा होता. त्यासाठी त्यांनी इंटरनेटवर ऑनलाईन हा क्रमांक शोधला व डॉक्टरांना फोन केला असता डॉ. राकेश असे नाव सांगणाऱ्याने त्यांच्याशी चर्चा करून अपॉईंटमेंटसाठी एक फाईल पाठविली. तसेच प्रदीप बाविस्कर यांचा बँक खाते क्रमांक, एटीएम कार्ड क्रमांक व सीव्हीव्ही क्रमांक अशी सर्व माहिती घेतली. त्यानंतर त्यांच्या खात्यातून १० लाख रुपये काढून घेतले.
हा प्रकार लक्षात आल्यानंतर विश्वेष बाविस्कर यांनी जळगाव सायबर पोलिस ठाण्यात फिर्याद दिली. त्यावरून संपर्क साधणाऱ्या अनोळखीविरुद्ध गुन्हा दाखल करण्यात आला आहे. पुढील तपास पोलिस निरीक्षक नीलेश गायकवाड करीत आहेत.
