जळगाव (प्रतिनिधी) मंदिराच्या दरवाजाचा कडीकोयंडा तोडून तीन अल्पवयीन मुलांनी दानपेटी लांबवून नेली होती. गुन्हा दाखल होताच रामानंद नगर पोलिसांनी शोध घेत तिघांनाही ताब्यात घटनेचा उलगडा केला. त्यांच्याकडून १४ हजार रुपयांची रोकड व दानपेटी हस्तगत गेली. ही घटना ५ ते ६ जून दरम्यान शहरातील गणपतीनगरात घडली.
शहरातील गणपती नगर परिसरात असलेले गणपती मंदिर ५ जून रोजी रात्री पुजाऱ्याने बंद केले. त्यानंतर चोरट्यांनीन मंदिराच्या दरवाजाचा कडीकोयंडा तोडून दानपेटी लांबविली. सकाळी पुजारी आले असता, त्यांना मंदिरातील दानपेटी दिसून आली नाही. त्यांनी सर्वत्र शोध घेतल्यानंतर देखील दानपेटी दिसून न आल्याने त्यांना मंदिरात चोरी झाल्याची खात्री झाली. याबाबत त्यांनी परिसरातील नागरिकांना माहिती दिली. सर्वांनी दानपेटीचा शोध घेतला मात्र ती सापडली नाही. या प्रकरणी विलास रमेश सांगेरे (वय ५२, रा. आदर्श नगर) यांनी रामानंद नगर पोलिस ठाण्यात फिर्याद दिली. त्यावरून चोरट्यांविरुद्ध गुन्हा दाखल करण्यात आला.
माहितीच्या आधारे आवळल्या मुसक्या
गुन्हा दाखल झाल्यानंतर ही चोरी तीन अल्पवयीन मुलांनी केल्याची माहिती रामानंद नगर पोलिस ठाण्याचे पोलिस निरीक्षक राजेंद्र गुंजाळ यांना मिळाली. त्यांनी चोरट्यांचा शोध घेण्याच्या सूचना दिल्या. त्यानुसार तपासाधिकारी पोहेकॉ सुशील चौधरी यांनी गुप्त माहितीच्या आधारे तीनही अल्पवयीन मुलांना ताब्यात घेत त्यांची चौकशी केली.
समज देवून पालकांच्या केले स्वाधीन
ताब्यात घेतलेल्या तिघांची चौकशी केल्यानंतर त्या तिघांनी गुन्ह्याची कबुली दिली व त्यांच्याकडून १४ हजार रुपयांची रोकड व पाच हजार रुपये किमतीची दानपेटी हस्तगत केली. तीनही अल्पवयीन मुलांना समज देऊन त्यांना पालकांच्या ताब्यात देण्यात आले.
