जळगाव (प्रतिनिधी) शहरातील खोटे नगर परिसरात एका अविवाहीत तरुणाने राहत्या घरात गळफास घेऊन आत्महत्या केल्याची दुर्दैवी घटना उघडकीस आली आहे. बाळासाहेब लोटन पवार (वय ३५), असे मयत तरुणाचे नाव आहे. बाळासाहेब हा तीन बहिणींचा एकुलता एक भाऊ होता तर त्याच्या आई-वडिलांचे पाच वर्षांपूर्वी निधन झाले आहे.
बाळासाहेब पवार याच्या आई-वडिलांचे चार ते पाच वर्षांपूर्वीच निधन झाले असून त्याच्या तीन बहिणींचे लग्न झाले आहे. त्यामुळे हा तरुण जळगावातील खोटेनगरात भाडेतत्वाच्या घरात एकटाच राहत होता. बाळासाहेब हा एमआयडीसीतील एका कंपनीत कामाला होता. रविवारी दुपार झाली तरी तो घराबाहेर दिसला नाही. त्यामुळे त्याचे घरमालक त्याला पाहण्यासाठी त्याच्या खोलीजवळ गेले. त्यांनी घरात डोकावून पाहिले असता, त्यांना बाळासाहेब पवार हा गळफास घेतलेल्या अवस्थेत दिसून आला. त्यांनी घटनेची माहिती रामानंद नगर पोलिसांना दिली. त्यानुसार पोलिस घटनास्थळी दाखल झाले. त्यांनी नागरिकांच्या मदतीने बाळासाहेब पवार याला खाली उतरवून शासकीय वैद्यकीय महाविद्यालय व रुग्णालयात दाखल केले. याप्रकरणी पोलिसात अकस्मात मृत्यूची नोंद करण्यात आली आहे.
बाळासाहेब पवार याला तीन बहिणी असून त्या सुरत, पुणे व धुळे जिल्ह्यातील नंदाडे येथे वास्तव्यास आहेत. अगोदरच आई-वडिलांचे निधन झालेले व त्यात एकुलत्या एक भावानेही जीवन संपविल्याने बहिणींवर दुःखाचा डोंगर कोसळला आहे. दरम्यान, बाळासाहेबने आत्महत्या का केली?., हे मात्र स्पष्ट होऊ शकली नाही. तीन बहिणींना लाडक्या भावाला काळाने हिरावल्याचे कळताच तिघींनी काळीज चिरणारा आक्रोश केला होता.
