सावदा ता. रावेर (प्रतिनिधी) येथून जवळच असलेल्या खिरोदा येथे गावठी कट्टा आणि जीवंत काडतुसांसह दोन जणांना पोलिसांनी अटक केली आहे. आयजी नाशिक यांचे पथक आणि सावदा पोलिस यांच्यातर्फे ही संयुक्त कारवाई करण्यात आली आहे.
यासंदर्भात अधिक असे की, सावदा पोलीस स्थानकाच्या हद्दीत येणाऱ्या खिरोदा गावातल्या बसस्थानक परिसरातील एका हॉटेलच्या समोर दोघांना ताब्यात घेण्यात आले आहे. त्यांच्याकडून एक गावठी कट्टा आणि एक जीवंत काडतुस जप्त करण्यात आले आहे. आय. जी. यांचे पथक व सावदा पोलीस यांचेतर्फे ही संयुक्त कारवाई करण्यात आली.
नाशिक परिक्षेत्राचे विशेष महानिरिक्षकांच्या पथकाला या संदर्भातील गुप्त माहिती मिळाली होती. या अनुषंगाने पथकातील ए. एस. आय. बशीर तडवी व हे कॉ राजेंद्र बोरसे यांनी सावदा पोलीस स्टेशनला याबाबतची माहिती दिली. यानुसार आयजींचे पथक आणि ए. पी. आय. देविदास इंगोले, पी.एस.आय. राजेंद्र पवार व समाधान गायकवाड, पो.हे.कॉ. मनोज हिरोळे, संजय चौधरी, ममता तडवी, यशवंत टहाकळे यांच्यासह सहकाऱ्यांनी आज दुपारी ही कारवाई केली.
