जळगाव (प्रतिनिधी) सोमवारी स्थानिक गुन्हे शाखेच्या पथकाने चोपड्यात दोन दुचाकी चोरट्यांना बेड्या ठोकल्या असून, त्यांच्याकडून तीन दुचाकी हस्तगत करण्यात आल्या आहेत. गणेश ऊर्फ घनशा शिलदार बारेला (२४, रा. कर्जाणा, ता. चोपडा), लखन ऊर्फ टारझन सुरेश बारेला (२२ रा. मध्य प्रदेश) अशी अटक केलेल्या दुचाकी चोरट्यांची नावे आहेत.
चोपडा शहरासह परिसरात दुचाकी चोरीसह घरफोड्या वाढल्या आहेत. चोरट्यांना पकडण्याच्या सूचना पोलिस अधीक्षक एम. राजकुमार व स्थानिक गुन्हे शाखेचे वरिष्ठ पोलिस निरीक्षक किसन नजनपाटील यांनी केल्या होत्या. चोपडा येथे घरफोडीच्या गुन्ह्यातील चोरट्यांचा शोध घेण्यासाठी सोमवारी स्थानिक गुन्हे शाखेचे पथक रवाना करण्यात आले होते. पथक चोपड्यात असताना किसन नजनपाटील यांना दुचाकी चोरीच्या गुन्ह्यातील संशयित गणेश बारेला हा कर्जाणा येथे असून, तो चोरीची दुचाकी वापरत असल्याची माहिती मिळाली. त्यांनी लागलीच पथक कर्जाणा येथे रवाना केले.
