अमळनेर (प्रतिनिधी) शहरातील डीडी नगरात घराच्या बांधकामाच्या ठिकाणी खेळत असलेल्या दोन मुलांपैकी एका मुलाला पाण्याच्या इलेक्ट्रिक मोटरचा विद्युत शॉक लागल्याने जागेवरच मृत्यू झाल्याची घटना बुधवारी घडली आहे यावेळी नातेवाईकांनी एकच अक्वास केल्याचे पाहायला मिळाले. याबाबत अमळनेर पोलिसात अकस्मात मृत्यूची नोंद करण्यात आली आहे. जगदीश सेनानी (वय – ६, रा.मंडवाळी, बडवाणी, मध्य प्रदेश हल्ली मुक्काम डीडी नगर, अमळनेर) असे मयत झालेल्या बालकाचे नाव आहे.
अमळनेर शहरातील डी.डी. नगरात हा कुटुंबासह धुळे रोड परिसरात असणाऱ्या डी. डी. नगर भागात सुरू असलेल्या घराच्या बांधकामासाठी मजुरी करण्यासाठी कुटुंबासह आला होता. बुधवारी १४ ऑगस्ट रोजी सकाळी ९ वाजेच्या सुमारास घरांना पाणी मारण्यासाठी सुरू असलेल्या पाणी मोटारजवळ तो खेळता खेळता गेल्याने त्याला विजेचा जोरदार धक्का बसला. त्याच्या कुटुंबीयांनी त्याला लागलीच ग्रामीण रुग्णालयात दाखल केले. मात्र वैद्यकीय अधिकारी यांनी तपासून त्याला मयत घोषित केले. यावेळी कुटुंबीयांनी मन हेलावणारा आक्रोश केला. याबाबत अमळनेर पोलीस स्टेशनमध्ये अकस्मात मृत्यूची नोंद करण्यात आली.
