जळगाव प्रतिनिधी । जळगाव तालुक्यातील बोरनार येथे बकऱ्यांना चारा घेण्यासाठी गेलेल्या एका प्रौढाचा सर्पदंश झाल्याने उपचारापुर्वीच मृत्यू झाल्याची घटना मंगळवारी सकाळी ८ वाजता घडली आहे. या घटनेमुळे परिसरात हळहळ व्यक्त केली जात आहे. याबाबत एमआयडीसी पोलीसात अकस्मात मृत्यूची नोंद करण्यात आली. शासकीय वैद्यकीय महाविद्यालयात शवविच्छेदन करून मृतदेह नातेवाईकांच्या ताब्यात देण्यात आला. संजय हिरामण पाटील वय-४७ रा. बोरनार ता. जळगाव असे मयत प्रौढाचे नाव आहे.
गावातील नातेवाईकांनी दिलेली माहिती अशी की, जळगाव तालुक्यातील बोरनार गावात संजय पाटील हे आपल्या पत्नी आणि दोन मुलांसह वास्तव्याला होते. शेतमजूरीसह बकऱ्यांचा व्यवसाय करून ते आपला परिवाराचा उदरनिर्वाह करत होते. नेहमीप्रमाणे मंगळवारी ९ जुलै रोजी सकाळी ६ वाजता ते बकऱ्यांना चारा घेण्यासाठी गावाजवळील शेतात गेले. त्यावेळी झुडूपाजवळ चारा काढत असतांना त्यांच्या पायाला सर्पदंश झाला. या घटनेची माहिती मिळाल्यानंतर गावातील ग्रामस्थांनी त्यांना तातडीने खासगी वाहनातून जळगाव येथील शासकीय वैद्यकीय महाविद्यालय व रूग्णालयात दाखल केले असता वैद्यकीय अधिकारी डॉ. रक्षा रोकडे यांनी मयत घोषीत केले. याबाबत एमआयडीसी पोलीस ठाण्यात अकस्मात मृत्यूची नोंद करण्यात आली. त्यांच्या पश्चात आई, भाऊ, पत्नी, दोन मुले असा परिवार आहे. ]
