जळगाव (प्रतिनिधी) साफसफाई करीत असतांना विजेचा शॉक लागून विशाल गोपी चिरावंडे (वय २६) रा. नशिराबाद या सफाई कर्मचाऱ्याचा दुर्देवी मृत्यू झाल्याची घटना मंगळवारी सकाळी ८ वाजेच्या सुमारास नशिराबाद येथे घडली. तरुणाचा मृतदेत शासकीय वैद्यकीय महाविद्यालयात आणल्यानंतर कुटुंबीयांनी काळीज चिरणारा आक्रोश केला.
जळगाव तालुक्यातील नशिराबाद विशाल गोपी चिरावंडे हा तरूण आपल्या परिवारासह वास्तव्याला आहे. गेल्या दोन वर्षांपासून नशिराबाद नगरपंचायत येथे सफाई कर्मचारी म्हणून कामाला होता. नेहमीप्रमाणे विशाल चिरावंडे हा मंगळवारी सकाळी ८ वाजता नशिराबाद गावजवळील शेताजवळ साफसफाईचे काम करीत होता. अचानक त्याला विजेचा जोरदार धक्का लागला. हा प्रकार आजूबाजूच्या नागरीकांच्या लक्षात आल्याने त्याला उचलून खासगी वाहनातून जिल्हा शासकीय वैद्यकीय महाविद्यालयात दाखल करण्यात आले होते.
यावेळी वैद्यकीय अधिकारी यांनी तपासणी अंती त्याला मयत घोषीत केले. यावेळी जिल्हा शासकीय वैद्यकीय महाविद्यालयात नातेवाईकांनी एकच आक्रोश केला होता. याबाबत नशिराबाद पोलीसात अकस्मात मृत्यूची नोंद करण्यात आली. विशाल चिरावंडे हे सफाई कर्मचाऱ्याची नोकरी करुन आपल्या कुटुंबाचा उदनिर्वाह करीत होते. घरातील कर्त्या व्यक्तीचा दुर्देवी मृत्यू झाल्यामुळे त्यांच्या कुटुंबावर दुःखाचा डोंगर कोसळला असून परिसरात हळहळ व्यक्त केली जात आहे. त्यांच्या पश्चात आई, तीन भाऊ, पत्नी व दोन मुली असा परिवार आहे. याप्रकरणी नशिराबाद पोलीस ठाण्यात अकस्मात मृत्यूची नोंद करण्यात आली आहे.
