जळगाव (प्रतिनिधी) बऱ्हाणपूर-अंकलेश्वर राष्ट्रीय महामार्ग चौपदरीकरण हे आधीच्या मूळ मार्गानेच करण्याबाबत आदेश पारित करावे, अशा आशयाची मोठी मागणी केंद्रीय राज्यमंत्री रक्षाताई खडसे यांची केंद्रीय रस्ते वाहतूक व महामार्ग मंत्री नितीन गडकरी यांच्याकडे केली आहे.
राष्ट्रीय महामार्ग बऱ्हाणपूर-अंकलेश्वर रस्ता चौपदरीकरण हे मुक्ताईनगर तालुक्यातून न करता आधीच्या मूळ मार्गानेच रावेर व सावदा येथून करणे, तसेच सदर रस्त्याचे सध्या चालू असलेले देखभाल दुरुस्ती तत्काळ सुरु करणे बाबत ठेकेदाराला आदेश करण्याबाबत आज केंद्रीय राज्यमंत्री रक्षाताई खडसे यांनी केंद्रीय रस्ते वाहतूक व महामार्ग मंत्री नितीन गडकरी यांची दिल्ली येथे भेट घेऊन मागणी केली. रक्षाताई खडसे यांच्या प्रयत्नाने राष्ट्रीय महामार्ग बऱ्हाणपूर-अंकलेश्वर रस्त्याचे चौपदरीकरण मंजूर झाले असून जमीन संपादन बाबत नुकतेच राजपत्र काढण्यात आलेले होते. सदर रस्ता पूर्वीच्या मार्गाने न करता मुक्ताईनगर तालुक्यातील गावांमधून जाणार असल्याने रावेर तालुक्यातील नागरिकांमध्ये नाराजी होती. तसेच सदर महामार्गाच्या देखभाल दुरुस्तीसाठी रक्षाताई खडसे यांच्या प्रयत्नाने रु.६१ कोटी निधी मंजूर झाला आहे.
ठेकेदारामार्फत दुरुस्तीचे काम संथ गतीने होत असून सध्या तर काम बंद आहे, अश्या नागरिकांच्या तक्रारी होत्या. त्यानुसार रक्षाताई खडसे यांनी आज केंद्रीय रस्ते वाहतूक व महामार्ग मंत्री नितीन गडकरी यांची भेट घेऊन सदर महामार्ग पूर्वीच्या मार्गानेच करणे तसेच सदर रस्त्याची देखभाल दुरुस्ती असलेल्या ठेकेदारास काम तत्काळ सुरु करण्याचे आदेश देणे नाही तर कंत्राटदार बदलविण्याबाबत मागणी केली. यावर गडकरी यांनी लवकरात लवकर कार्यवाही करणेबाबत आश्वासन दिले.
