चोपडा (प्रतिनिधी) शहरात मेन रोडवरील सोनम इलेक्ट्रॉनिक्सच्या बाजूला असलेले वैभव ज्वेलर्स या दुकानाचे शटर वाकून चोरट्यांनी चोरी केली. अवघ्या महिन्याभरात पाचवी धाडसी चोरी झाल्याने यामुळे शहरात व्यापाऱ्यांमध्ये चांगलेच भीतीचे वातावरण निर्माण झाले आहे.
याबाबत सविस्तर असे की, मेन रोडवरील सोनम इलेक्ट्रॉनिकच्या समोरील वैभव ज्वेलर्स या दुकानाचे शटर वाकून रात्रीच्या तीन साडेतीनच्या सुमारास चोरी केल्याचे उघड झाले आहे. चोरटे हे अज्ञात असले तरी मोटर सायकलवरून येत असतात व आपला हात साफ करून जात आहे. नुकत्याच समर्थ ट्रेडर्स वर झालेल्या चोरीचेच चोरटे आज तेज चोरटे वैभव ज्वेलर्सच्या सीसीटीव्हीच्या फुटेजमध्ये आलेले आहे.
वैभव ज्वेलर्सचे मालक हे रात्री चांदी व सोने आपल्या घरी घेऊन जात असल्यामुळे किरकोळ वीस हजार रुपयांच्या जवळपास चोरी झाल्याचे समजते. परंतु रोज छोट्या मोठ्या चोऱ्या सुरू असल्याने सामान्य जनतेत भीतीचे वातावरण पसरलेले आहे. मागील गुन्ह्याच्या तपास होत नाही, तोपर्यंतच दुसरी चोरी करून चोरटे पसार झाले आहेत. वैभव ज्वेलर्स फोडणारे चोरटे अवघ्या 50 ते 60 किलोमीटरच्या अंतरातले असावेत असा संशय पोलीस निरीक्षक के.के. पाटील यांनी व्यक्त केला आहे. चोरट्याच्या गॅंगमध्ये एक स्थानिक ही इसम असावा असाही संशय त्यांनी व्यक्त केला आहे.
पो.नि. पाटील यांनी व्यापाऱ्यांना आवाहन म्हटले आहे की, दुकानात सीसीटीव्ही कॅमेरे बसवणे, काही दुकानं मिळून एक सुरक्षा रक्षक नेमणे आवश्यक आहे. परंतू व्यापाऱ्यांनी कोणतीही भीती बाळगू नये, चोरट्यांना लवकरच गजाआड केले जाईल असे आश्वासन त्यांनी दिले. यावेळी माजी विधानसभा अध्यक्ष अरुणभाई गुजराथी यांनीही वैभव ज्वेलर्सची पाहणी केली. तसेच शहरात चोरीचे प्रमाण वाढले आहे. यासाठी आपण सर्व मिळून काय करू शकतो?, याकडे लक्ष देणे आवश्यक असल्याचे त्यांनी म्हटले.
