जामनेर (प्रतिनिधी) तालुक्यातील कापूसवाडी आणि जामनेर येथील दोन वेगवेगळ्या महिलांच्या आधार कार्डाचा क्रमांक एकच असल्याचा आश्चर्यजनक प्रकार समोर आला आहे. जामनेर येथील महिलेने शासनाच्या स्वस्त धान्य योजनेचा लाभ मिळविण्यासाठी दुकानदाराकडे आधार क्रमांक दिला असता त्याच क्रमांकावर दुसरीच महिला लाभ घेत असल्याचे दिसून आल्याने हा गोंधळ उघड झाला. दरम्यान, यातून मार्ग कसा काढावा, अशा पेचात आता पुरवठा विभाग सापडला आहे.
चौकशीतून सत्य समोर यावे
संध्या बँक खात्याबरोबरच शासनाच्या विविध योजनांचा लाभ घेण्यासाठी देखील आधार क्रमांक जोडावा लागत असल्याने हा प्रकार दिसून आला परंतु यामुळेच मोठा घोळ होण्याची शक्यता नाकारत येत नाही. बनावट आधार कार्डचे रॅकेटही यातून समोर येण्याची शक्यता आहे. गैरफायदा घेतला जाण्याचीही शक्यता असल्याने प्रशासनाने सखोल चौकशी करावी, अशी मागणी होत आहे. शहरात यापूर्वी दिव्यांगांना बनावट ओळखपत्र बनवून देणाऱ्याचे रॅकेट उघडकीस आले होते. अंत्योदयसह काही योजनांचा लाभ पात्र नसलेले नागरिकदेखील घेत होते.
कसा आला हा घोळ समोर?
जामेनर तहसीलमधील पुरवठा निरीक्षक विठ्ठल काकडे यांच्याकडे जामनेर निवासी महिलेने आधार कार्डवरील सारख्याच क्रमांकामुळे धान्य योजनेचा लाभ मिळत नसल्याची तक्रार केली. त्यांचा आधार क्र. ६५०७ ४१०० ६०४३ असा आहे. हाच क्रमांक दुसऱ्याही एका महिलेचा असल्याचे संबंधित धान्य दुकानदाराने त्यांना सांगितले.
पुरवठा विभागाने संगणकीय प्रणालीत याची खातरजमासुद्धा केली. त्यानुसार हाच आधार क्रमांक कापूसवाडी, ता. जामनेर येथील महिलेचा असल्याचे दिसून आले. काकडे यांनी दोन्ही कार्ड जमा केले असून, या प्रकारची माहिती तहसीलदार व जिल्हा पुरवठा अधिकारी यांना कळविली आहे.
