झारखंड (वृत्तसंस्था) काही दिवसांपूर्वी कोरोनाची (coronavirus) लस घेतल्याने गुडघेदुखी कमी झाल्याचा दावा एका वृद्धाने केला होता. आता असाच एक प्रकार पुढे आला आहे. एका व्यक्तीने लस घेतल्यानंतर बोलता येत असल्याचे सांगितले आहे. एका अपघातात त्यांचा आवाज गेला होता. मात्र, कोविशील्डची लस घेतल्याने त्यांचे जीवन सोपे झाले.
दुलारचंद मुंडा (वय ५५, रा. सालगडीह, रोहन मुंडा, झारखंड) असे इसमाचे नाव आहे. दुलारचंद मुंडा यांचा पाच वर्षांपूर्वी रस्ता अपघात झाला होता. या अपघातात ते गंभीर जखमी झाले होते. उपचारानंतर त्यांची प्रकृती बरी झाली होती. मात्र, त्यांच्या शरीराच्या अवयवांनी काम करणे बंद केले होते. तसेच त्यांचा आवाजही कमी होत गेला. जवळपास एक वर्ष त्यांना आयुष्य खाटेवरच घालवावे लागले होते. त्यांना नीट बोलताही येत नव्हते.
कुटुंबातील एकमेव कमावत्या व्यक्तीची प्रकृती अस्वस्थ झाल्याने कुटुंबाचा उदरनिर्वाहाचा प्रश्न निर्माण झाला होता. दुलारचंद यांनी जीवनाची आशाही सोडली होती. मात्र, कोविशील्डची लस घेतल्याने त्यांचे जीवन सोपे झाले. कोविशील्ड लस घेतल्याने पाच वर्षांपासून आयुष्याशी लढा देणाऱ्या दुलारचंद यांची प्रकृती बरीच झाली नाही तर ते व्यवस्थित बोलू लागले. उलट त्यांच्या शरीराला नवसंजीवनी मिळाली. पंचायत प्रमुख सुमित्रा देवी आणि माजी प्रमुख महेंद्र मुंडा यांनीही हे कोरोना लसीमुळे झाल्याचे सांगितले.
हा तपासाचा विषय
अंगणवाडी केंद्रातील सेविकेने चार जानेवारीला दुलारचंद मुंडा यांच्या घरी जाऊन कोरोनाची कोविशील्ड लस दिली होती. पाच जानेवारीपासून त्यांचे निर्जीव शरीर काम करू लागले. दुलारचंद यांना मणक्याची समस्या आहे. ज्याचे अनेक प्रकारचे रिपोर्ट्स आम्ही बघितले आहे. त्यांची प्रकृती ठीक झाल्याने हा तपासाचा विषय झाला आहे, असे वैद्यकीय प्रभारी डॉ. अलबेल केरकेट्टा यांनी सांगितले. सिव्हिल सर्जन डॉ. जितेंद्र कुमार यांनी या घटनेला धक्कादायक म्हटले आहे.
